Addis Ababa:- Gummaa’masenni afrikunni kullannita gobboomu amaalamme assate hende loonsanni hee’noommo yaanni gobboomu amaalammete komishiine komishinerchi Ambaasaadder Mehammed Diriiri coyi’ri.
Komishiner Ambaasaadder Mehammed Diriiri Itophiyu Pireesete Uurrinshara xawisino garinni; gobboomu amaalamme hanqafaanchimmanna beeqqisiisate, illachunna noonke dagate batinyi garinni Afrikunni gummaa’masenni kullannita gobboomu amaalamme assate hende loonsanni hee’noonni.
Afrikunni gummaame gobboomu amaalamme assitino gobbuwa amaalamme assitinnohu qara hajubba aana ikkasi xawise; lawishshaho Keeniyunnita gobboomu amaalammete harinsho doorsha harinsi yanna qooxeessira kalaqamino canco ga’labbisatenna mootimmate amanyoote kaajjishate harinsoonnita ikkasenni illachu bikkaminoha ikkasi kayisino.
Hattonni “Itophiyaho harinsanniti gobboomu amaalamme komishinere garinni illachu konneeti; togo ikka noosi” yineemmo harinsho hooggurono; xaa geeshsha huwantoommohunna la’noommohunni dagatewiinni ka’annori qara illachuwa batinyete” yaanni xawisino.
“Gaance tirate ragaanni lawishshaho; Ruwaandunniti gobboomu amaalamme gummaamete” yine kullanni yiinohu komishiner Mehammedi; ikkollana gaance lame gosa mereero kalaqantinota ikkase qummi assino. “Ninke gobbara me’’e daga mereero kipho nooro minu kiiro” yaanni coyi’rino. Konne baala qarra tirtannota gobboomu amaalamme assinannitano qummeessino.
Konni kaiminni qara ikkitino qarrubbanna badooshshenke rumushshunni daga umise afantinowa garunni tirranni harinsho heedhannota xawisino.
Gobbankera harinsanniti gobboomu amaalamme beeqisiissannota, hanqafaancho, ammanantinotanna daganniwa adhamooshshe afidhinota ikkasenni; Afriku giddo harinsoonni amaalammete harinsho giddonni jawate yiniro kapho dikkanno yinohu komishinerchu; korkaatuno Itophiyu 110 Miliyoone ali daga heedhanno gobbaati yiino.
Gobboomu amaalamme goofimarchu timo gutunnita gobboomu sumimme kalaqa, jawaata mootimmate amanyoote gatamaranna haaro dimokraasete fooliishsho hanafisiisa ikkinota qummi asse; “Gobba giddono ikko gobbaanni heedhannori Itophiyu daga tenne kaayyo horonsidhe gobbanke noose qarrinni fultanno gede dagase taalleenyunni, Dimokraasetenna keerunni heedhanno gede assa hasiissannonke yiino.
Kuni keeru gumi kayinni latishshu widira reekkisannonkeha, gobba gatamarre ilamate sayinseemmo gede baalunku gummaa’mitanno gede uminke sharro assa hasiissannonke” yaanni sokkasi sayisino.
Qiddist Gezaheny
Bakkalcho Birra 29, 2016 M.D
