Addis Ababa:- Turizimete lamalanni shiqqinoti fotote reqecco hundihanna techoo Addis Ababa leellishshanno taje ikkase Jeengiz Palati xawisino.
Kalqete 44kinna Itophiyaho 36ki yannara Masqelu xawira Turizimete lamala ayirrinsoonni. Turizimete lamalanni Addis Ababu budu, seesimurgotenna turizimete biiro Itophiyu pireesete uurrinsha ledo halamatenni fotote reqecco Mesqelu xawira shiqishshino.
Turkete latishshunna halamate ejense Addis Ababu qixxaawo riqiwamaanchi Jengiz Palati Itophiyu pireesete uurrinsha ledo assino hasaawinni; fotote reqecco Addis Ababu beronna techo noose soorro xawisse leellishshinote. Soorro suwashsho doogo harunsitinota ikkasi fotote reqecconni huwatoommo yiino.
Addis Ababu beronna techo amado, quchumu budenna seesimurgote hattono turizimete base leellishshanno fotta reqeccote aana shiqqino yiinohu Jengizi; reqeccote amado fotote taje akata xawissannota ikkase xawisino.
Addis Ababaho afantanno daa’’attote basenna uurrinshuwa diru dirunkunni kiirotenni batidhanni daggino. Kunino batinye daa’’ataano gobba e’anno gede assitanni afantanno yiinohu Jengezi; Itophiyu kalaqamu elto aamantinose gobba ikkase leellishannoha haammata looso loosa hasiissanno yino.
Addis Ababu budu, seesimurgotenna turizimete biiro layinki biirote sooreessi kalaa Haftay Gebre-Igzaberihu isi widoonni; fotote reqecco quchumu turizimete base leellishate qoxxaabbinote. Fotote reqecco aana ispoortetenna fayyimmate turizime birenna tayxe hattono quchumu turizime hiittoo soorro abbitinoro leellishshanno foto daa’’attote shiqqinote yiino.
Reqeccote aana shiqqino foto dhaggenna dona ikkite owaattannore ikkansanni dagganno ilama quchumu maminni mamira reekkaminoro huwattanno gedenna maa loosa hasiissannonsaro leellishshannoreeti yinohu kalaa Haftayi; 80 ale Ambaasaadderooti reqecco daa’’attinore ikkansa qummeessino. Konninnino quchumu nooseta turizimete jiro shiimunni huwattanno gede assitino yaatenni xawisino.
Itophiyu pireesete uurrinsha haaroonsote loosinni haammata fotote reqecco babbaxxitino gobbate kifilera qixxeessite daa’’attote fano assitino yiinohu kayinni uurrinshu amadote handaari layinkihu qaru losu gumulshaanchi kalaa Fiqaadu Ketemaho.
Kalaa Fiqaadu xawishshi garinni; Itophiyu pireesete uurrinsha Itophiyunnita 82 dirra dhagge gaazeexunna Fototenni amaddino jawa uurrinshaati. Uurrinshate giddo batinye uurrinshuwa dhagge afantanno. Konni garinni addi addi uurrinshuwa fotote reqecco uurrinsha qixxeessitannonsa gede xa’mitanno. Turizimete lamalanni shiqqinoti fotote reqecco tenne biso ikkase xawisino.
I.P.U gobbayidi hajo ministerera, Addis Ababu quchumi gashshootira, EBC nna babbaxxitino uurrinshuwara fotote reqecco qixxeessitino. Xa kayinni muli yannanni daa’’attote shiqqanno fotote reqecco qixxeessitanni afantannota xawisino.
Reqeccote aana 200 ali foto reqeccote shiqqinoha ikkanna; Addis Ababu quchumi amaale mini songaafitte dukko Buzeena Alqadiriti, layinki kantiibu ba’lattonni loosu, Interpirayizetenna Industirete biiro sooreessi kalaa Zhanxirar Abbayihunna Addis Ababu quchumi budu, seesimurgotenna turizimete biiro sooreette dokter Hirut Kaasiti reqecco maassidhe fantino.
Reqecco Birra 20-22, 2016 M.D geeshsha Mesqel xawira baalanti Addis Ababu quchumi teessaano baatooshshiweelo daa’’ata dandiitannota kulloonni.
Qiddist Gezzaheny
BakkalchoBirra 22, 2016 M.D
