– IFDR Mootimmate Hidhonna Jajju Biilloonyi
Adaama:- Tayxe baajeettete dirinni 169 Federaalete uurrinshuwa mootimmate elektiroonikisete hidho gumultanno gede assinannita Mootimmate Hidhonna Jajju Biilloonyi egensiisi.
Mootimmate hidhonna jajju biilloonyi 30 ale ikkitanno tuqu xaadooshshuwa ogeeyyera tenne lamalara Adaamu quchumira mootimmate elektiroonikisete hidho lainohunni huwanyoote kalaqate qajeelsha uytino.
Biilloonyunnihu qaru dayirekterichi kalaa Haaji Ibsa tenne yannara coyi’ranni; amandoonnihu 2016 baajeettete dirinni Federaalete uurrinshuwa mootimmate elektiroonikisete hidho gumnultanno gede assinanni yiino.
Biilloonyu qaru dayrekterichi kalaa Haaji xawishshi garinni; gobbate jiro xibbuunni 60% ale ikkitannoti hidhote fulo ikkitanno.
Mootimmate elektirooniksete hidho muishsha, mooranna jirote hafanfarre gatissannota ammannanni yiinohu kalaa Haaji; konnirano 6 Afrikunna 14 kalqoomu gobbuwa rosicho kaima assine gobboomu deerrinni tenne yannitte hayyo giddora e’noonnita qummeessino.
2016 baajeettete dirinnino umikki bocu boci dirinni 154 Federaalete uurrinshuwa diru giddo hidhitannore lainohunni elekitirooniksetenni gumulate mixonsa shiqishidhinoha ikkanna; 2kume 310 ale ga’rafono tenne hayyonni fushsha dandiinoonnita egensiisino.
Mootimmate hidho lainohunni konni albaanni loosu aana keeshshino lallawa woyyeessine Dagate riqiwamaano amaale minira shiqinshoonniha ikkanna; muli yanna giddo kaajjinsheenna loosu aana hosiinsanni yine agarrannitano xawisino.
2014M.D gobboomu deerrinni 9 uurrinshuwa, 2015M.D kayinni 74 uurrinshuwa tenne hayyo giddora e’anno gede assinoonni yiinohu qaru dayrekterichi; 2016 baajeette dirinni 169 uurrinshuwa mootimmate hidhonna ga’rafo elekitirooniksete hayyonno gumultanno gede assinanni hee’noonnita kulino.
22 ministere loosu minna giddonni 21; hattono mite mite Amaaru qoqqowira afantanno Yuniversitubbanna Meqele Yuniversite agurranna; kiirotenni 40 Yuniveritubba hidhonna ga’rafo elekitirooniksete hayyonni gumultanno gede assa dandiinoonni.
Amaaru qoqqowira ga’labbote qarri korkaatinni tenne hayyo giddora e’inokki Yuniversitubba agurranna Meqele Yuniversite kayinni tayxe dirinni onlaynete hayyo giddora eessinannitano xawinsoonni.
Elekitirooniksete mootimmate hidhonna ga’rafo yannitte hayyonni gumultanno gede assinanniri mootimmate uurinshuwa mereerinni Yoote minna, Rosunna Fayyimmate ministere lawishshaho kullannireeti.
Tenne hayyo qoqqowubbate illacha tunge halashshinanniha ikkanna; xaa geeshsha Sidaamu qoqqowi wolootta qoqqowubbanni balaxe mootimmate hidhonna ga’rafo elekitirooniksete hayyonni gumulatenni lawishshu gede kayinsanniha ikkasino qaru dayrekterichi Haaji Ibsa coyi’rino.
Tini yannitte hayyo mooranna jirote hafanfarre wo’munni wo’ma gatissannote yiinohu kalaa Haaji; mootimmate uurrinshuwa calla ikitukkinni 12 kumi ale ikkitannori daddalaanono tenne hayyonni horoonsi’rate borreessantinota qummeessino.
Mootimmate hidho elektiroonikesete hayyonni gumulantannonna handaarunni agarranni gumu maareekkamanno gede hedo cu’mishiishate ragaanni tuqu xaadooshshuwa qeechi luphiima ikkinotano qaru dayrekterichi lede xawisino.
Amsaalu Felleqe
BakkalchoBirra 22, 2016 M.D
