Addisi Ababa: – Komishiine looso hanaffu yannara ledonke loosate sumuu yitino poletiku paartuwa sase calla ikkiturono; loonsoommo loosinni xaa yannara 47 poletiku paartuwa ledonke loosate sumuu yitinota Itophiyu Gobboomu Amaalammete Qaru Komishiinerichi Piroofeser Mesfiini Ariaya xawisi.
Qaru Komishinerichi Pirofeseri Mesfiini Ariayahu Itophiyu Pireesete Uurrinshara xawisinonte gede, looso hananfummo yannara sase poletiku paartuwa calla ledo loosate sumuu yitinohura hattenne yannara yaadisinonke. Komishiine deerru deerrunkunni loossino loossinni kalaqqino gambooshshinni xaa yannara Doorshu Boordera borreessante noo 53 poletiku paarte giddo 47 ninke ledo loosate sumimme malaatisse loossanni afantanno.
Gobboomu amaalamemra baalunku poletiku paartuwanna Itophiyu daga karsanna beeqqaano ikkitanno gede assa hasiissanno yiino. Gobbboomu amaalamme qinaabbanno gede ninke loonseemmo looso harunsa calla ikkikkinni, sumbetenni komishiinete ledo xaade loosanna irkisa hasiissannota xawisino.
Komishiinerichu pro.Mesfiini, “ninke loosonke loonsanni hee`noommohu wo`ma keeraanchimmanniiti; xaa geeshsha Mootumma ikkito gobbaydi anga mereeroho e’anno gede difajjinoommo. Ayii woyteno difajjineemmo”yiino.
Xaa geeshsha Gobboomu Amalamme Komishiine qara qara balaxote qixxaawo looso jeefissanni noota kulinohu Pirofeserichu Mesfiini, lamalu qoqqowiranna lamu quchumu gashhsootira woraddate deerrinni beeqqano filate looso jeefinsoonnita egensiisino.
Tenne qoqqowubba mereero Sidaamu, Harare, Gambellunna, Beenshaangule Gumuze afantanno yiino.
Sufeno, Oromo, Amaaru, Somaale, Tigirayenna haaruuddu qoqqowubba beeqqaano badate mixo amandoonnita qummeesse, Somaalete qoqqowi xaa yannara qajeelsha hanafinohura muli yanna giddo qoqqowaho woradu deerrinni beeqqano bandannita caakkeessino.
Tenne lamalara Tigirayete qoqqowira ha`ne qoqqowunniha yannate gashshooti Pirezidaanticha Kalaa Geetaachew Radda afi`ne hasaawinsoommo yiinohu Qaru Komishinerichi, tenne hajote aana hasaamboommo; loosonke fajjinonke. Roorenkanni coy qinaawannohu kaabinetenna dagate riqiwamaano ledo hasiisanno garinni hasaambummo gedensaaniiti yee kulinonke yiino.
Baara widonni noo Itophiyu qansootino togoota harinshote doogo insa ledono hasaawu ajenda gamba assine beeqqaano assate loosono loonsannita qummeessino.
Abrahaam Saamueel
BakkalchoBirra 22, 2016 M.D
