Addis Ababa:- Qoqqowoho sai dirira Yuuriyu madaabbari shiqisho anjenna madaabbaru moori laalchimmate anje kalaqantanno gede assinota Sidaamu Qoqqowi Irshunna Kalaqamu Jiro Latishshi Biiro egensiissu.
Biirote Sooreessi Kalaa Memmiru Moke I.P.U ledo bilbilunni assino keeshshonni xawisanni; qoqqowoho sai dirira dooramino wixa 82% shiqinsheenna wixunni dimboonni; NPS madaabbarano wo’munni wo’ma shiqinshoonni yiino.
Ikkollana, loosidhe galtinori baattonsa balaxxe qixxeessidhe wixidhanno qooxeessubbara Yuuriyu madaabbari shiqisho anjenna madaabbaru moori ledo xaaddino ikkitubba mite mite qooxeessubbara laalchimmate anje kalaqantanno gede assitinota coyi’rino.
Konni kaiminni agarroonni laalcho afi’nannikki gede assinota qummeessinohu kalaa Memmiru; sai dirira xaaddino mitiimmuwanna foonqe tiratenni tayxe laalchu dirinni gibirinnu loossara hasiisannore balanxe shiqishatenna yannatenni loosidhe galtino dagara iillishate balaxote qixxaawo assinoonnita egensiisino.
Loosidhe galtino daga baattonsa balaxxe qixxeessidhanno gede assatenni gobboomu deerrinnino dooramino wixanna bushshu madaabbara balanxe shiqishate illachinshe loonsanni hee’noonni daafira sai dirira xaaddino foonqe konni dirinni xaaddannokki gede murci’ne loonsanni hee’noonni yiinohu Biirote sooreessi; baxxinohunni madaabbara mooratenninna hafanfarsatenni laalchimmate aana gawajjo iillitanno gede assitino mannooti seerunni xa’mantanno gede assate farcote bissanni ledo qinaambe loonsanni hee’noonnita qummeessino.
Loosidhe galtinorira iillinshanni gede sonkoonniha bushshu madaabbara mooratenni angansa noonsarenna halamaanono poletikunni gashshootunni hattono seerunni qorichishantanno gede assinanni hee’noonnita lede xawisinohu kalaa Memmiru; seerunni qorichishantanno gede assateno hajo la’annonsa bissa widoonni hajonsa buunxanni hee’noonnita qummeessino.
Konni laalchu dirinnino lame doyichonni gorsunni laashshinanni laalchira illacha tunge loosatenninna dooramino wixinna bushshu madaabbari mooramannokkinna hafanfarannokki gede qorophine loosatenni qoqqowunniha laalchonna laalchimma lossate kaajjine loonsannita coyi’rino.
Bununna gummate laalorano jawa illacha tunge laashshatenni qoqqowunna gobbate hattono loosidhe galtinori eo lossatenna qansootahono loosu kaayyo hala’ladunni kalaqate illachinshoonnita lede xawisino.
Amsaalu Felleqe
Bakkalcho Birra 22, 2016 M.D
