Addis Ababa:- Itophiyu dhaggesenni umikki yannara Qamadete laalchinni luphiima guma maareekkisiissino yaanni Afriku Latishshu Baanke pirezidaantichi Akinwumi Adeesiina (Dr.) xawisi.
Afriku Latishshu Baanke pirezidaantichi kalqete sagalete baraarshi hasaawi aana assino hasaawinni; Itophiyu Qamadete laalchinni umose dandaate seyoote harinsho naadino.
Qamadete latishshi AK 2022/23 garinni laalchu dirinni 1.4 miliyoone hektaare baatto widira lossa dandiinoonniha ikkanna; hektaaretenni 2 toone Qamadete laalcho afi’nanniwiinni 4 toone widira lossa dandaase naandanniha ikkasi coyi’rino.
Itophiyaho AK 2023 laalchu dirinni 1.6 miliyoone meetrik toone Qamadete laalcho gamba assinanni yine agarranni yiino.
Awuropu kiiro garinni 2018/19 laalchu diriinni 5 kume hektaare baatto aana laashshinanniha Qamadete laalcho AK 2022/23 laalchu dirinni 1.4 miliyoone hektaare baatto aana laashsha dandiinoonnita qaagiissino.
Afriku Latishshu Baanke Gibrinnu tekinoloje reekko kakkayishshi Itophiyu Qamadetenni umose dandaate wo’naalsha kaa’late 100 kume toone ale ikkannoha moolle dandee laalcho aannoha dooramino wixa shiqishinota qummeessino.
Hasaawu bare aana IFDR Pirezidaantitte Sahileworq Zewude lede babbaxxitino gobbuwa mootimmate loosu sooreeyyenna Afriku Latishshu Baanke loosu massagaano leeltino. Pirezidaantitte Sahileworq Zewude barete hasaawira qoteho haammata gutu hasaawa assitino.
Afriku Latishshu Baanke pirezidaantichi Akinwumi Adeesiina konni albaanni Xaphoomu ministirchi Abiy Ahimed (Dr.) ledo Addis Ababaho loonsoonnita haaroonshu loossa towaate la’’asi qaangannite.
Gaazeexu Odeesaanchinni
BakkalchoBirra 22, 2016 M.D
