Addis Ababa:– Gobbate gargarooshshu olantonke giirate giddoonni sa`anni umonsa ikkadda assitannorenna kaajjite fultanno wolqaati yaanni Jeneraal Geetaachew Guddina xawisi. 116ki olantote barra lainohunni paanaalete hasaawa harinsoonni.
Paanaalete aana hasaawa assinohu Gobbate Gargarooshshe Olanto Giddo Mashalaqqete Qara Biddishshu sooreessi Jeneraal Geetaachew Guddina; kalaqantanno shiimmaaddanna manaadda qarrubbanni olanto laaffinota labbannonsari no. Ikkollana, gargarooshshu olantonke giirate giddoonni sa`anni, umonsa ikkadda assitannorenna kaajjite fultanno wolqaati yiino. Olanto luphiimu deerrinni jawaattanni hadhanni nootano xawisino.
Kiirotenni, isilanchimmatenninna ikkadimmatenni hala`ladda sharro gumultinori nootano buuxise; gargarooshshu olanto soorrote ledo umonsa haaroonsitanni jiffa sharrantanni guma borreessiissanni noota huwachishino.
Jeneraalchu; olanto waaga baattanni gobba sufisiisate hajo aana loossanniiti noohu yiino. Ikkollana, gobbate shetto ikkitino wolquwa olantote aana babbaxxitino doogonni gaaddannota; su`mase bushiishatenni babbaxxitino dagoomu kifilla gara ikkitinokki doogonni hembeelsitannotanna kaphu mashalaqqe tuqisatenni dhukase laafisate wo`naalsha assitannota xawisino.
Giddoydinninna gobbaydinnino xaaddanno ga`labbotenna hobbaatu qarrubba dandiite uurratenninna ajishatenni gobboomu hobbaate ammansiisannoha assatenni Itophiya sufisate yawo amadde loossanni noota coyi`rino. Konninnino luphiima kakkalo baattanni afantannota buuxisino. Tini jawaante qaagama nooseno yiino.
Olanto ikkate giddo noo daafuri hala`ladoho yiinohu Jeneraalichu; olanto yannate bisunna lubbote kakkalooshshe baattanni gobba hegersate yawo garunni fultanni noota egensiisino. “Xa xaaddino jiffano ikkadimmatenni fultanni noo olanto ikkasenna qasiisotenni sa`ne Afriku deerrinni togoo olanto afira ayirritannote” yiino.
Gaamote hedo cu`midhe olantote ledo sharrantannori heedhurono olanto kakkalooshshe baattanni noohu gobba sufisate ikkinota coyi`rino. Dagoomu tenne garunni huwate olantono awuuta noosita huwachishino. “Xa xaaddinonke qasiisotenna gobboomu akati kaiminni tini olanto kaajjadu garinni sufa hasiissannonsa. Konnirano baalanti dagoomu bissa olanto jawaachishanna kaajjisha noose” yiino.
Olu Wolquwa Xaphoomu Itaamaazhoor Shuume Olantote Hajubba Amaalaanchi Letenaal Jeneraal Alemishet Deggife amuraatu aana xawisanni; olantote barra ayirrinsannihu keereho gottimma aatenniiti yiino.
Fulle ea, latishshunna lopho heedhannohu keeru dirranno woyte ikkinota xawise; olanto gobba kaajjitaranna keeru dirrara babbaxxitino yannanni ayirrado lubbose aate geeshsha waaga baattinota kaysino.
Letenaal Jeneraal Alemishet; keere buuxisatenna daga umisenni keeraabbino heeshsho massagganno gede olanto techo geeshsha babbakke loossanni noota xawisatenni; dagate keeru hasatto qarru giddora eessitanno hajubba tirantanno gede assatenni jawiidi qeecha fultanni noota buuxisino.
Barra ayirrinsannihu keere luphi assine la’’atenni, gobba kaajjishate sharro gumultino olanto galatatenni, olanto dagate ledo sheemaatensa haaronsatenni ikkinota coyi`rino.
Birigaadeer Jeneraal Tesfaye Habtemaariyam isi widoonni; olanto madidhannohu, mundiitannohunna reytannohu dagate ikkinota coyi`rino. Tenne olanto su`mase bushiisha gara ikkitinokkitano xawisino. Gobbase baxxannoti Itophiyu daga baala olanto irkisa noosetano egensiisino.
116ki olantote barra “Jifantu yannanni kaajjitannoti qeellete olanto” yaanno massagote
Abbebech Maatewoos
Bakkalcho Birra 15, 2016 M.D
