Addis Ababa:- Hawaasi Quchumi gashshooti Haweela Tuulate Sinu Quchumi Umi Dirimi Hospitaale amuwunna marqu qaaqquulli rewo ajishate jawa illacha tugge loonsanni noota xawinsi.
Hospitaalennihu Qaru Loosu Harisaanchi Kalaa Sisay Bisharu Itophiyu Pireesete Uurrinshara xawisinonte gede, Hospitaalete uynanni owaante kiirotenni haammata ikkitanna, tenne giddo mitte amuwunna marqu qaaqquulli rewo ajishate uynanni owaanteeti. Amuwunna marqu qaaqquulli reyo ajishate gobbate deerrinni jawa illacha tunge loonsanniha ikkanna; Tuulate Hospitaaleno tenne owaante aana illachiishshe loossanni noota xawisino.
Hospitaale xaphoomunni 1 miliyoone ali dagarano owaante uytanni noota buuxisinohu Qaru Loosu Harisaanchi; Tuulate qooxeessi dagoomira calla ikkikkinni olluu woraddaranna muli Oromiyu qoqqowi dagoomirano lifixa owaante uytanni afantannota huwachishino.
Kalaa Sisay, Hosipitaale uytanno owaante umi dirimi deerri Hoosipitaale gede ikkikkinni xaphoomu Hosipitaale gede jajjabba owaanteno uytanni noota qummeesse, umi dirimi Hospitaallara uynannikkiha lame kiilo woro ikkite ilantino marqu qaaqquulli (immediate kangaroo care) yinannita owaanteno tenne fayyimmate uurrinshara uynannita coyi’rino.
Sooressu xawishshi garinni, Mootimma amuwunna qaaqquullu fayyimma woyyeessatenna reyo ajishate aana uytino illachi jawaho; konninni eela dirrine dagoomaho huwanyo kalanqanni daafira tenne Hospitaalera dagge owante afidhanno amuwinna marqu qaaqquulli rewo jawu garinni ajisha dandiinoonnita egensiisino.
Kalaa Sisay yiinonte gede, “Hospitaale uytannoti owaante yanna yannatenni isilanchimmase woyyaabbanni dagginohu qaru korkaati Hawaasi Riferaalete Hospitaale ledora gamba yine halamme loonsanni hee`noonnihuraati.
Hospitaale gobba tayisse sa’anno qara doogo aana afantanno daafira, haammata dano iillitinno dagoomirano wiinamu owaante uytannotano Kalaa Sisay qummeessino.
Hospitaale dagoomaho 24 saate owaante uytannota kulinohu Sooreessu; ayii yannara tekinoloojete irkisantinoti owaante noohura daga dagge wo`ma owaante afidhe higgannotano hasaawino.
Hospitaale xaggate shiqqo ikkadu garinni shiqishshannota kulinohu Kalaa Sisay, xagisi`rate dagganno owatamaano 98 anga xibbunni xagga afidhannohu giddonni ikkinotano guwursino.
Xagga, Mootimma uytanno kaapitaalete baajeette, quchummu gashhsooti irkonna giddo eonni gamba assine 30 miliyoone ikkanno woxinni bocu boci dirinni Itophiyu Xagga Shiqishshanno Uurrinshsha Hawaasi sinu biironni hirre shiqinshannita kule; gattino xagga kayinni gobboomu garafo fushshine wonshinannita buuxisino.
Ikkirono, Hospitaalete dagoomira xagga shiqishate aana qarru wo`munni wo`ma tidhaminokkita xawise; tenne foonqe mootimmano la`e wonshitanno gede hasaambanni loonsanni hee`noonnitano xawisino.
Abrahaam Saamueel
Bakkalcho Birra 15, 2016 M.D
