Addis Ababa:- Farcote handaara ammanamooshshe bowirsate tantanote soorro assinannita farcote ministirchi dokter Gedeyoon Ximootewoosihu xawisi.
Farcote handaara ammanamooshshenna adhamooshshe bowirsate soorrote loossa illacha tunge gumullanni gede dagate riqiwamaano amaale mine seerunna farcote hajubba uurrinshu komite huwachishshino.
Uurrinshu komite, Farcote ministerenna woshshamaano uurrinshuwa bocu boci jeefishsha, reekkote farco poolisete qixxaawo noo deerra hattono farcote handaarinni qaru soorrote loosi noo harinsho keentino.
Uurrinshu komitera rippoorte shiqishinohu ministirchu dokter Gedeyoon Ximootewoosihu coyi’ranni; farcote handaara ammanamooshshe bowirsate soorrote loossa gumulantannota huwachishinno.
Ikkeennano baajeetete anje, mannu wolqa lolanke, loosu xiiwonni qoqqowubba gumulote fooliishshora reekkama hoogansa, mite mite qooxeessubbara kalaqantannoti ga’labbote qarrubba xiiwo ikkitara dandiitannota xawisino.
Farcote handaarinni tantanote soorro assinanni yinohu ministirchu; dagoomunni ka’’anno koffeenya, woxarattonna uyinanni owaantenni hagiidha hoogate qarrubba ittisate illacha tunganni yino.
Handaaru ammanamooshshenna adhamooshshe lossate loonsanni loosi dagooma illachishinnoha ikkannotanna budillaancho harinsho yannaasincho farcote amanyooti ledo qineessatenni Itophiyaho dagooma kaima assitino farco kalaqate aana illachinshannita qummeessino.
Soorrote loosi farcote handaari ogeeyyenna massagaano ikkadimmatenna akatoomu ledo amadaminohunni noo foonqe filate aana illachishshannota qummi assino. Gumuloteno seeru hanqafo qixxeessinannitano coyi’rino.
Reekkote farco poolisete hanqafo harinsho umi fooliishsho jeefantanni afantannota qummi assino.
Seejjote mine seejjamaanote ledo amadaminohunni baajeetete anje korkaatinni ka’’anni keeshshino koffeenya tirate balaxo uyine dawaro qolloonnita coyi’rino.
Xaginaatu owaante aate harinsho ledo amadaminohunni gumulantino jaddo lainohunni buuxote kisse taashshatenni loosu giddora e’nanni yino.
Tajete amadooshshi amanyoote yannaasincho assate qinaawinoha mashalaqqete xaadooshshe horonsi’nanni gara gumullanni. Rosichunninna ogimmate ikkadda ogeeyye loosohonna heeshshote akata woyyeessatenni uurrinshate giddo keeshshitanno gede loonsanniha ikkanno yino.
Gashshootu farco amanyoote yannaasincho assanna lifixa assa, handaaru ammanamooshshe lossate looso illacha tunge gumullannita xawisino. soorrote harinsho gummaame assate uurrinshate gatamarshinna haaroonsote handaara tantanatenni massagantanni afantannota coyi’rino.
Uurrinshu komite gambisaancho Itsegennet Mengistuti ise widoonni, sioorrote loossara baxxino illacha uyine gumullanni hee’noonnita kulte; amaalete mini harunso loosi biso ikkinota xawissino.
Soorrote harinshonni reekkote fooliishshora e’inokki qoqqowubba e’anno gede harunsonna xiiwo assinannita xawisse; farcote handaarinni gumulantanno xaphoomu soorrote loossanna harinshote gumulora irko assinanni yitinno.
Seeru loosi mixo amaalete minira shiqqanno woyte hasiisanno akata wonshine shiqa hasiissannota xawisatenni; ogeeyyetenni mannu wolqa lolanke hajo mala kalaqa hasiissannota huwachishshino.
Seejjamaanote shiqisho aana koffeenya kayinsanni keeshshinoonni baajeete taashshate hajo aana woyyaambe assine dawaro uyinoonnita uurrinshu komite danchummatenni kayissino.
Qiddist Gezaheny
Bakkalcho Birra 15, 2016 M.D
