Addis Ababa:- Gargarooshshu olanto yanna yannantenni kakkalantanni gobba hegersitinoti naaxxissanno dhagge ilamate tareessa hasiissannota Sidaamu qoqqowi pirezidaantichi Desta Ledamo xawisi.
Gobbate gargarooshshu olanto Wodiidi Hajajo 116ki Olantote barra sa’u Maakisanyote barra Hawaasi quchumira babbaxxitino qixxaawubbanni ayirrissino.
Ayyaanu amuraati aana leellinohu Sidaamu qoqqowi pirezidaantichi kalaa Desta Ledamo coyi’rino garinni; gargarooshshu olanto babbaxxitino yannara gobbate aana xaaddino jifubbanni lubbonsa kakkalamatenni ayirrado gobba hegersitino.
Gargarooshshu olanto albi annuwanni ragidhino bareendenni gobbate dannanna dagoomu hobbaate agartanni keeshshitinorenna dhaggete annuwa ikkansanni hiittenne yannarano qaangannireeti yiino.
Olanto duuchu dagoominna Itophiyimmate tii’’inni gatamarantanno gede assa sokkonsa gumulate dhukansa lossidhanno gede assinotano pirezidaantichu coyi’rino.
Gargarooshshu olanto Itophiyu diinnatenni meexantannokki gedenna gobbate mittimma kaajjitanno gede assitanni keeshshitinota daga huwatatennino aleenni waatinsara ikkitanno gede woshshatto assino.
Qoqqowu daganna mootimmano olantote noonsa ayirrinyi luphiima ikkasi qummeessinohu pirezidaantichu kalaa Desta; hiittenne yannante gede kaa’lonsa kaajjishshe suffannota buuxisino.
Gargarooshshu oalnto Wodiidi Hajajo qaru hajajaanchi Leetenaant Jeneraal Selemoon Ittefa isi widoonni; olanto gobate danna agarte ayirrinyese agarsiisatenni jawa dhagge loossino; loossannino afantanno yiino.
Gobbate mittimmanna dagate ayirrinyi yekkeerote shiqqannokkita ikkasenni, olanto lubbonsa kakkalamate geeshsha waaga baattannore ikkansanni Olantote barra ayirrisa roorenkanni dhukansa lossatenna bareendansa lexxatenni hattono woloottu wedellino insa karsantanno gede kaayyo kalaqannota huwachishino.
Olanto yannitte tekinolojenni irkisatennino sa’ne xaa yannara noonsa dhukinna uurrinshi kaajjado tantanonna egennotenni dhaabbattinore assine tantannoonnitano Leetenaant Jeneraalichu Selemooni xawisino.
Gargarooshshu olanto gobbatenni sa’e wolootta gobbuwarano keere agarsiisate sokko garunni fultanni afantannore dagate wolqa ikkansa qummeesse; dagate baxilli kaajjillinsa buicho ikkinota coyi’rino.
Ayyaanu amuraati aana leellinohu Sidaamu qoqqowi poolisete komishiine komishiinerchi Shimellis Toomaasi coyi’ranni; gobbate gargarooshshu olanto miilla dagatenna gobbate luphiima waaga baattanni keeshshitino yiino.
Olantote gobbatenna dagate waaga baattanno harinsho ilamate sa’anna olantote barra ayirrisa tiiu kakkaooshshenna bareendensa leddannotano qummeessino.
Duuchu dagoomi mittimma agarino garinni tantannoonnita kaajjado olanto ikkansannino huwachishino.
“Jifantu Yannara Baalate Kaajjado Qeellete Olanto” yaanno adawarshinni Itophiyu deerrinni 116ki yannara olantote barra gobboomu deerrinni techo Addis Ababaho Masqalu xawira babbaxxitino qixxaawubbanni ayirrinsoonni.
Gaazeexu Odeessaanchinni
Bakkalcho Birra 15, 2016 M.D
