Addis Ababa:- Gobba jawachishshannota, kaajjishshannota, latishshaho kaima ikkitannotanna dhuka ajjinorira kaa’lo ikkitannota gutu hedo hala’ladunni gatamara hasiissannota xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (dr) jireenyu paarte massagaano qajeelshi aana “Jawiidita gutu hedo” yaanno uminni tenne lamala giddo assino hasaawinni; gobba jawaachishshannota, kaajjishshannota, latishshaho kakkayissannotanna dhukiweelloota kaa’late ikkitanno dhagge gatamara hasiissanno yiino.
Jawiiditi gutu hedo giddose batinye dhagge amaddinote yinohu xaphoomu ministirchi; gutu hedo mimmito diiggannokkita, xiibbannokkita,gamba yite jiroo’mitinotanna jawaata Itophiya kalaqqannota hattono baalanti dhagge jawa Abbayi kalaqqannotanna dhagge gamba yite jawiidi Itophiya kalaqate qarrantannokkita ikka noose yiino.
Gobba mittimmatenna wo’munku handaari lophowa shiqqi assa dandiitanno wolqa giddosenni kalaqqannotanna gobba gatamartannota, kaajjishshannota, latishshaho kakkayissannotanna dhukiweeloota kaa’litanno dhagge hala’ladunni gatamara hasiissannota egensiisino.
Xaphoomu ministirchi xawishshi garinni; mitto mittonka Itophiyu qansicha gamba assitannoti gutu hedo kalaqanturo kaa’lineemmohu umonkenna oosonkeeti. Konnira jawiidita sumuu assitanno hedo poletikaho ikkikkinni gamba yine gobbate gede uurrate, jawaatate, reekkamatenna jiroo’mate horonsi’ra hasiissannonke yiino.
Jawiidi gutu hedonni sumuu yaate harinsho giddo balaxo uyinannihu jiroo’mitinota, keerunnitanna roduuwu mitteenni hee’ra dandiitanno gobba kalaqa yitanno hedo ikkitara hasiisannota xawisino.
Mittu aannohunna adhannohu kiirotenna danunni baxxara dandaanno ikkinnina woloota hasi’neemmokkire callinke ikkadda dikkinoommo yiinohu xaphoomu ministirchi; mitteenni hee’ratenna gutu hedo kalaqanna halashsha Itophiyunni sa’e Afrikaho lowo geeshsha hasiissannota ikkase egensiisino.
Gutu hedo, illachu, ajuuja, sumimme, halamme, kakkaooshshu, murci’raanchimma, anga co’eessi’ra qinaambe kalaqqanno qara hajubba ikkitanna; kuri wonsha dandiitino ikkito maate, qooxeessa, gobbanna Ahigure jireenyu widira iillisha dandiitannota xawisino.
Hembeelama, gaance, mimmito macciishsha hooga gobba diigganno ikkito kalaqqannore ikkansanni baalunku qansooti qinaawa ikkito kalaqa hasiissannonsata egensiisino.
Kalqe ikkitote gumaati; hiittino dureette gobba callise hasiisannore wo’munni wo’ma qixxeessa dandiitannoti dino. Uyineemmo bikkinni adha hoongammora dandiineemmo ikkinnina adhitukkinni uyitukkinni uurra dandiitanno gobba dino yino.
Gutu hedo garunni subbinota jawa gobba kalaqqanno; suwa hoogguro wole qassanno, shokkitanno yinohu xaphoomu ministirchi dokter Abiyi; sammi yine coyi’ra ikkikkinni harunso assa hasiissannota xawisino.
Gutu hedo callise, ajuuja callise, iillonna sarraaqamino coyi e’’ote widira iillishannokkiha ikkasihuwachishe; gutu hedo, beeqqonna guma gamba assa hasiissannota xawisino.
Qiddist Gezaheny
Bakkalcho Birra 15, 2016 M.D
