Seerimalate olu uduunne amadde dooyisitanno jaddaasini Sidaamu Dagoomi qoqqowi Galabbote Gaamo Wolqanna Dagoomu Mashalaqqe Hobbaati qorqortonni seeru hundaanni Assinoonni.
Kaimansa Amaaru Qoqqowa assidihinori Fiqiru Alemaayyo, Tesfaayye Mikaaeelinna Dureessi Gammadihu yinanniri seerimale olu uduunne dooyissitannori Koodde 2 taargu kiiro 89763 ikkino mini kaameelinni Baahir Daarete quchuminni ka’’atenni Dillu quchumira 50 turke loossino shugguxenna 10 kume ikkitanno xiyyiitta amadde milli yitanna seeru hundaanni assinoonni.
Jaddaasine seeru hundaanni assate kaajjado harunso assinanni keeshshinoonnita xawisinohu Sidaamu Qoqqowi Keerunna Galabbote Biiro Sooreessi Kalaa Alemaayyo Ximootoosihu; tini opireshiine qinaabbanno gede qeechansa fultino bissano galatino.
Kalaa Alemaayyo Ximootoosihu lede, mootimmate ille duucha ikkitino daafira daga jaddote loosi ledo sumuu yitannokki daafo, hunote wolqa jaddo gumulte xa`mantukkini gattonnokkita huwata hasiissannonsata xawisino.
Gaazeexu Odeessaanchinni
Bakkalcho Birra 8, 2016 M.D
