Addis Ababa:- Sidaamu qoqqowira tayxe laalchu dirinni 2 kume 750 hekitaare baatto aana arri yanna gorsu Qamade wixate balaxote qixxaawo assinanni hee’noonnita Qoqqowu Irshunna Kalaqamu Jiro Latishshi Biiro egensiissu.
Sidaamu Qoqqowi Irshunna Kalaqamu Jiro Latishshi Biiro Sooreessi Kalaa Memmiru Moke Itophiyu pireesete uurrinshara xawisino garinni; qoqqowoho diilallote gade kaima assatenni duuchanka gidu sircho laashshinanni.
Qoqqowoho arri yanna gorsu Qamade sai 2013M.D hananfe laashshinanni hee’noonnita xawisinohu Biirote sooreessi; tayxe laalchu dirinnino xaphoomunni 2 kume 750 hekitaare baatto aana laashshate mixo amandoonnita coyi’rino.
Kalaa Memmiru xawishshi garinni; qoqqowoho arri yanna gorsu Qamade sai 2013 laalchu dirinni umikki yannara 80 hekitaare; 2014 M.D 100 hekitaare; 2015M.D 1 kumenna 6 hekitaare baatto aana laashshinoonnita kule; 2016 laalchu dirinni kayinni 2 kume 750 hekitaare baatto wixunni diwate balaxote qixxaawo assinanni hee’noonnita egensiisino.
Qoqqowoho arri gorsu yanna Qamade lede wolootta rumuddate sircho 68 kume hekitaare baatto aana latinsannita qummeessinohu kalaa Memmiru; arri gorsinni latinsanni xaphooma hekitaare baatto giddonni 2 kume 750 hekitaare arri yanna Qamadenni diwantanno yiino.
Amadisiiseno, qoqqowoho baxxinohuni badheessu yannara Badala, Wahenna rumuddate sircho laashshinanniha ikkanna; Badala hala’ladunni laashshinannita xawisino.
Sai badheessu yannara 7 kume 510 hektaare baatto badalate wixinni diwantino yiinohu kalaa Memmiru; konninni, xaphoomunni 1.8 miliyoone kuntaala laalcho gamba assate mixo amande loonsanni hee’noonnita xawisino.
Xaa geeshshano 36 kume 586 hektaare ale baatto aana badheessu yannara winxoonni babbaxxino wixinni xaphoomunni 1.3 miliyoone kuntaala laalcho gamba assa dandiinoonni yiino.
Kunino, laalchimma lainohunni badala mitte hekitaarenni mereerimunni 48.5 kuntaala laalcho afi’ra dandiinoonnita qummeessino.
Qoqqowoho sai 2013M.D kayse 2015M.D geeshsha mite mite qooxeessubbara xeenu anje kaiminni winxoonni gidi aana gawajjonna laalchu anje xaaddinota kaysinohu Sooreessu; baxxinohunni sa’u lame dirra badala hala’ladunni laashshitanno qooxeessubbara 25 hekitaare ale ikkitanno baatto aana winxoonni badala gawajjantinota coyi’rino.
Amsaalu Felleqe
Bakkalcho Birra 8, 2016 M.D
