-1 kumi 328 rosi minna mitticho rosaanchono saysa dandiitinokkireeti
Addis Ababa:- 2015 Rosu dirinni 12ki kifile gobboomu fonqolo adhitinori mereerinni 845 kuminna 99 rosaano 50%na hakkonni aleenni ikkanno guma maareekkisiisa dandiitinota Rosu ministere egensiissu.
Rosaano fonqolisiissinori 3 kumi 106 rosu minna mereerinni 1 kumi 328 rosi minna mitticho rosaanchono saysa dandiitinokkita xawinsoonni.
Rosu ministirchi pirofeeser Birhaanu Negga 2015 rosu diri 12ki kifile gobboomu fonqoli guma lainohunni uyno xawishshinni; sai rosu dirinni fonqolo adhit inori 845 kuminna 99 rosaano mereerinni xibbuunni 50%na hakkonni ale ikkino guma maareekkisiissinori 27 kume 267 rosaano callate. Kunino, xaphoomunni fonqolo adhitino rosaano mereerinni 3.2% calla ikkanno yiino.
Rosaano fonqolisiissinori 3 kumi 106 rosi minna mereerinni onte rosi minna rosaanonsa wo’munni wo’ma sayissinota qummeessinohu Ministirchu; 1 kume 328 rosi minna yaano 42.8% ikkitannori kayinni mitticho rosaanchono saysa dandiitinokkita xawisino.
Kalaqamu sayinse golinni maareekkaminohu luphiimu gumi 647/700 ikkanna; dagoomu sayinsenni kayinni 533/600 ikkinota egensiisino. Dagoomu sayinsenni golinni 15 rosaano 500 ale; kalaqamu sayinse golinni kayinni 200 rosaano 600 ale guma maareekkisiissinoreeti yiino.
Ministirchu xawishshi garinni; gobboomu deerrinni mereerimu gumi 28.65% ikkanna; luphiimu gumi 30.99% Kemistiretenni; woffi yino gumi kayinni 25.62% Shallagote rosinni maareekkamino.
Gobboomu mereerimu gumi koo/teenni la’niro labballunnihu mereerimu fonqolu gumi 29.55% ikkanna meentunnihu kayinni 27.64% ikkino.
Ledoteno, hashshi yannara rosonsa harunsite fonqolantinori 16 kumi 541 rosaano mereerinni sa’inori 12 rosaano calla ikkitanna hallanyunni fonqolantinori 169 kumi 502 rosaano mereerinni sa’inori 498 rosaanooti. Kunino, ganyunni uynanni rosu yanna gobbaanni uynanni rosi isilanchimma garunni buuxa hasiissannota leellishannoha ikkasi qummeessino. Maareekkamino gumi rosu amanyooti hiiqqamme sissate xaano lowo looso agarannoha ikkasinni qummeessinohu Ministirchu; rumuxxino qarra tirate hajo la’annonsari baalu halamme hasiisanno yiino.
Wocawaaro 29/2016M.D hanafe aantino shoole barrubbara Tigirayete qoqqowira uynanni hee’noonnihu 12ki kifile fonqolo adhate 9 kume 514 rosaano borreessantinota qaagiissinohu Ministirchu pirofeeser Birhaanu; fonqolamaanote guma harancho yanna giddo faajje assinannitanna sa’anno rosaano sa’u Sanyo barra fonqolu gumansa faajje assini rosaanonni ledo Yuniversite e’anno gede assate wo’naallannita xawisino.
Sai 2014 Rosu diri 12ki kifile gobboomu fonqolo adhitinori 896 kumi 520 rosaano mereerinni 30 kuminna 34 (3.3%) ikkannori callu 50%na hakkonni aleenni guma maareekkisiisa dandiitinoti qaangannite.
Amsaalu Felleqe
Bakkalcho Birra 1, 2016 M.D
