Addis Ababa:- Xa yanna buxima sharrammeemmota calla ikkikkinni Itophiyu noose jiro fushshatenni gutunni latinseemmo yannaati yee IFDR xaphoomu ministirchi Abiy Ahimed (D/r) coyi`ri.
Xaphoomu ministirchi Abiy Ahimed (D/r) sayinsete muuziyemera qixxaabbinota gobboomu turizimetenna koyinse adhate investimente leellisho fanino.
Tenne yannara xaphoomu ministirchi Abiy Ahimed (D/r); Itophiya bacu biinfillinna kalaqamu iillo assine egensiisate hattono noonke dhuka fushshate baalunku Itophiyu daga gobbanke noose jiro la“a, fushsha, egensiisanna owaata agarantannonke yiino.
Ninke shooshanqetenna jawaantete gobbaanni hoongoommori dino yiinohu xaphoomu ministirchi; xa yanna buxima sharrammeemmota calla ikkikkinni Itophiyu noose jiro fushshatenni gutunni latinseemmo yannaati yee xawisino.
Itophiyu turizimete handaara gotti assite fushshitanno dhagge, donu,ha`nuru budi; maala`lissanno baattote ofollo, gaxigalu saadanna muro hattono babbaxxitino coyibba amaddino yiinohu xaphoomu ministirchi; illenke fanne la“a, la`noommota latisatenni fulanno gede assa hattono egensiisanna owaantete aamamishshanke lossa dandiinummoro gutunni lanteemmo yee coyi`rino.
Leellisho Itophiya injiitannota daa“attote iillo assitannose foto lawishshu garinni leellishshannote yee xaphoomu ministirchi huwachishino.
Itophiyu nooseta hala`lado turizimete jiro mittu hari giddo leellisha Abbay mooqqotenni yinanninte gede ayirrannoha ikkirono; turizimete ministere leellisho qixxeessatenni assitino wo`naalshi galatisiisannonna jironke roore egensiisate kaa`lannoho yiino.
Itophiyu 900 diri biraannu /Gogu aana borreessinoonni/ doni nooseta; umiseha yannate kiiro, duuchu budinna turizimete jiro noose gobba ikkase buuxise; mite mite gobbuwa kayinni 200 diri dhagge nafa heedhunsakkinni noonsata egensiisatenninna leellisho kalaqatenni eo gamba assitanno; ninkeno noonke jiro garunni horonsi`ne gutunni lata noonke yiino.
Xaphoomu ministirchi xawishshi garinni; 10 diri latishshu mixubba giddonni baxxinohunnino miinju handaari heelliichuwa mereerinni qaru turizimete handaaraati. Handaara garunni horonsi’ratenni Afrikaho addaxxinanni gobba gatamaara dandiineemmo.
Turizimete ministercho ambaasaadder Naassiise Caali ise widoonni xawissino garinni; turizimete handaari millimmonni gobbate gede xaara hanafote looso gumullirono; xaphoomu ministirchi Abiy Ahimedihunni gumulantinoti gebeta lehager, gebeta letiwuliddi turizimete latishshubba handaaru lophora hexxo uyitannotanna hallanyu handaara jawaachishshannote.
Leellisho Itophiyunnita turizimete jiro egensiisatenna handaara lossate kaa`litanno yitinoti ministircho; lophitino gobbuwa duuchu garinni horonsidhanni afantanno turizime lossate baalunku qansichi wo`naalsha assa hasiissannosita qummeessino.
Gobboomu turizimetenna hospitaalitete investimente leellisho fanote amuraati aana jireenyu paarte layinki pirezidaante kalaa Adem Farah hattono babbaxxitino ministirootinna mootimmate loosu sooreeyye afantino.
Leellisho qoqqowu turizimete biirubba ledotenni 100 ali handaarunni bobbakkino hoteella, daa“atisiisaano uurrinshuwa, qoqqowu turizimete biirubba, miidiyunna tekinoloojete uurrinshuwa leellishotenni beeqqitino.
Gobboomu turizimetenna hospitaalitete investimente leellisho wocawaaro 29 hanafe birra 28/2016 M.D geeshsha keeshshitannota buunxoonni.
Abbebech Maatewoos
Bakkalcho Birra 1, 2016 M.D
