Addisi Ababa: – Tayxe dirono Irreechu ayyaani Wocawaaro 26-27/2016 MD geeshsha budesinna hornyasi agadhino garinni biifino garinni Addis Ababahonna Biishooftu Hora- Arsiide ayirrinsanni. Konni ayyaanira dagannna gobboomunni fultino budu gaamonna woshshatto assinoonni wosini dagge beeqqate qixxaabbe no.
Sidaamu Qoqqowi budu gaamono Irreechu ayyaanira dagge beeqqaano ikkate addi addi qixxaawo assite feeffatte noota Sidaamu Qoqqowi Woga, Turizimenna Ispoortete Biiro xawissino.
Woga, Turizimenna Ispoortete Biiro Woga Dhaggenna Donu Xiinxallonna Latishshu Dayirektere Dayrekterichi Kalaa Tafarri Ledamohu Bakkalcho gaazeexi ledo hasaawino garinni, Oromote dagara galatunniha ikkino Irreechu ayyaanira beeqqaano ikkate qixxaabbe noota qummeesse, gobba baalantenni dagge Irreechu ayyaanira beeqqano ikka dagate mereero noo xaadooshshe kaajjishate jawa qeecha afi`rinota xawisino.
Kalaa Tafarri yaatto garinni, Sidaamu Qoqqowino Irreechu ayyaana albano beeqqannonte gede tayxeno iibbino garinni beeqqate, wedellu, geerru, seennu hattono mootimmate bissano ledo hanqaffino gaamo konne barra quqquxamatenni agadhitannota kule; Sidaamu bude hornyasi, gadesi, budu uddanna labballunnita, seennunnunnita jajjabbunnitanna hattono budisi jiro baala gobbatenna kalqete leellishate qixxaawee noota huwachishino.
Mitte daga wole daga ayyaana beeqqase mimmitu ledo mittimmanna dagoomu xaaddooshshe kaajjishate sae, gadesinna budesi soorri’rate jawa qeecha afi`rinota xawise; badooshshu nookkiha Oromo Sidaamunniha, Amaarunniha Tigirenniha, ayirrisa Itophiyu daga mereero baxillenna lopho leddanno yiino Kalaa Tafarri.
Abrahaam Saamueel
Bakkalcho Wocawaaro 24, 2016 M.D
