Irreechu dagate mereero dagoomu xaadooshshe kalaqatenni miinju ijaarira noosi qeechi jawa ikkinota IFDR Woganna Turizimete Ministeere Ministerchi Kalaa Qajeeli Merdaasihu xawisi
34ki Gumi Beleeli hasaawi battalara “Irreechu, mittimmatenna rodiimmate malaateeti” yaanno massagote hedonni albi oommbarra harinsoonni.
Pirogiraamete aana afaminohu Wogatenna Ispoortete Ministerchi Kalaa Qajeela Merdaasa xawisanni, Irreechu turizimete handaara baxxinohunni miinju hajubba aana haammata qeecha afi`rino.
Ayyaanu dagate mereero dagoomu xaadooshshenna mittimma kalaqatenni gobbanke miinja kaajjishate qeechisi jawaho yiino.
Kalaa Qajeeli xawishshi agarinni, Irreechu hawadunni Wocawaaru widira, tunsichunni arrishote xawaabbi widira sa`nanni yanna ikkitanna, budu hornyasi agadhino garinni Kaaliiqa galaxxatenni ayirrinsanni ayyaanaati.
Ayyaanu daguumu hornyi noosihonna daga xaadde ayirrissanno mittimmate xawisha ikkinota kulinohu Ministerchu, sa`u yannara giwame koma amadino manni araaramanno, sa`nore agurte mittimmatenni hagiirrunni ayirrissanno ayyaanaati yiino.
Irreechu dagoomu xaadooshshe kalaqatenni dagate mittimma kaajjishate hattono, gaance heedhannokki gede assanno ayyaana ikkinota qummeesse, ayyaanu Oromote daga callate ikkikkinni wolootuno dagoomu kifillano mittimmatenni hanqafe beeqqaano assannoha ikkinota huwachishino.
Irreechu gedee ayyaanna ayirrisanna latisa dagoomu xaadooshshe kaajjishannoha ikkasinni, gobba turuzimete handaarinni miinjase lossate qeechasi fulanno ayyaana ikkinota buuxisino.
Oromote Qoqqowi Kominikeeshinete Biiro Sooreessi Kalaa Hayilu Addunyihu isi widoonni, Irreechu Oromote daga budenna hornya agadhino garinni wolootu Itophiyu daga ledo gutunni ayirrinsannita hasaawino.
Ayyaanu daga Magano galaxxitannoho; daanno dirira hexxo assidhanno galatu ayyaanati yiinohu Ministerchu Qajeeli, Irreecha wolootu roduuwu daga ledo ayirrisate dandiisiissanno hedo aana amaalate Gumu Baleeli battala qixxeessinoonni yiino.
34ki Gumi Baleeli hasaawu battalara Jimmu Yuniversite rosiisaancho ikkinohu Dr Derejje Fuufahu hasaawu borro shiqishino. Battalate, babbaxxitino mootimmate uurrinshanni fultino sooreeyyenna Yuniversitete rosaanonna woshshatto assinoonni wosini afamano.
Abrahaam Saamueel
Bakkalcho Wocawaaro 24, 2016 M.D
