Addis Ababa:- Qoqqowoho afantanno 90 ale ikkitanno aliidi layinki dirimi rosi minna mereerinni 60 ikkitannori safote latishshuwa wonshinoonnire ikkansa Sidaamu Qoqqowi Rosu Biiro egensiissu.
Rosu minna deerra woyyeessate dagoomu beeqqo kaajjisha hasiissannotano xawinsoonni.
Sidaamu Qoqqowi Rosu Biiro 2ki Sooreessinna Rosu Budi Qixxaawonna Tekinolojete Halashsho Handaari Sooreessi kalaa Miliyoon Yossa Itophiyu pireesete uurrinshara xawisino garinni; qoqqowoho rosu minna deerra woyyeessate loossa sai hawadi yannara xibbuunni 50% ale gumulloonni.
Tayxeha rosu looso hanafate albaanni sai Maaja 3/2015M.D hananfe qoqqowu deerrinni baalante olluubbara rosu minna deerra woyyeessate millimillote bare harinsanni keeshshinoonni yiinohu kalaa Miliyooni; konnira illachu rosu minna woyyeessate loosira woxunni, wolqatenna uduunnunni jiro gamba assate ikkinota coyi’rino.
Konnirano qoteho rosu minnara safote latishshuwa halashshatenni rosu minna deerra woyyeessate qarunni woffi yino deerrira noore worroonni istaandaarde garinni woyyeessinanni raga worroonnita qummeessino.
Kalaa Miliyooni xawishshi garinni qoqqowoho afantanno 90 ale ikkitanno aliidi layinki dirimi rosi minna mereerinni 60 ikkitannori caabbichu, way ICT mereershuwa, wo’naalshu minnanna labbannori safote latishshuwa wonshinoonnireeti.
Kuri rosi minnarano 600 ale ikkitanno kompiyuterranna elekitirooniksete uduunne gatamaratenni rosu loossa dijitaale tekinolojenni irkisate injeessinoonnita qummeessino. Sai hawadi yannara 10 ICT mereershuwa tantannoonnitano egensiisino.
Qoqqowoho haaro rosu bude loosu aana hosiisa hananfoonniha ikkanna; konnira attamisiinsanni hee’noonni 640 kume maxaaffa giddonni xaa geeshsha 100 kume maxaaffa shiqqinotanna gattinoti Wocawaaru agani goomimarchi geeshsha attamanta angara e’annota kulino.
Ledoteno, 1ki-4ki kifile geeshsha noo rosaanora irkisatenna kaajjishate ikkitannota 140 kume ale ikkitanno maxaaffa attamisiinse rosu minnara tuqinsanni hee’noonnita huwachishino.
Amsaalu Felleqe
Bakkalcho Wocawaaro 24, 2016 M.D
