Hawaasa: Sidaamu Dagoomu Qoqqowi Mootimma Quchumu Latishshinna Konistiraakishiinete Biiro 2016 sekiterete diru songo harissu.
Sidaamu Dagoomu Qoqqowi Mootimma Quchumu Latishshinna Konistiraakishiinete Biiro “lifixa owaante aamamaanchimma quchummanke jireenyira” yaanno massagote qaalinni 2016 sekitereta diru songo bero barra Hawaas Quchumira ha’rissino.
Barraho afame afii-fanote hasaawa assinohu Jireenyu Paarte Sidaamu Qoqqowi Sinu Borro Mini Sooreessi Kalaa Abirahaam Maarshaallohu, pilaanetenni massagantannonna teessaanote injiitino quchumma kalaqa hasiissannota coy’rino.
Pilaanetenni massagantannokki quchumma co’ittenna biifado ikkitannokkihura teessaanote heeshshora injiitannota dikkitanno yiinohu Kalaa Abirahaami, quchummate seerimale assootta gargaratenni; pilaanetenni massagamanno quchumma pilaanetenni calla massagantanno assa hasiissannota huwachishino.
Kalaa Abirahaami, Quchummate akati dagate akatanna heeshsho xawisannoha ikkonno gede qummeesse; quchumma pilaanetenni massagate woyyaabbinota assa hasiissannota qaagiisse; quchumma hasi’noonni deerrinni co’ittenna dooramaancho ikkira hasiisiro qole massagaanote calla agurranni hajo dikkitino. Konni daafira quchumma co’itte, dooramaanchonna teessaanote injiitinota ikkitanno gede baalunku qansichi qeechasi falara hasiissannota egensiisino.
Sidaamu Dagoomu Qoqqowi Mootimma Quchumu Latishshinna Konistiraakishiinete Biiro Sooreessi Kalaa Ashshaagire Jemberuhu sisi widoonni, Quchumma miinjunna politiku mereershaati. Ikkinohurano quchumma pilaanetenninna qorophotenni massaga hoongiro aantete quchummate lophoranna qansootu jireenyira quficho ikkitannohura 2015 M.D biirote gede kuri loossa xinqine gumula dandiinanni garinni mixi’ne loonsanni sa’noonni yiino.
Konni kaiminni quchummate safote latishshanna quchumma co’itte biifado assate loossa mixi’noonni garinni gumulantinohano ikkiro; ledote illacha hasidhanno loossa noo gede keenote bandoonnita xawisino.
Quchumaho hasiisannori mereerinni mittu teessannote ikkado baattote shiqo qixxeessate yiinohu biirote sooreessi; konni ragaannino noo loossa keennanni woyte woyyinori noo gede leellishannorino hee’rino xaano lende illacha tuga hasiissanno hajo ikkitino gede bandoonnita coy’rino.
Addisu Adoola
Bakkalcho Wocawaaro 24, 2016 M.D
