Addis Ababa:– Haanju harumi bushshu hoshooshamannokki gede gargarate, laalo laashshate, diishsho malawatenna saada xiikkate qara ikkinota Sidaamu Qoqqowi Mootimma Pirezidaantichi Kalaa Desta Ledamo coyi`ri.
Pirezidaantichu Kalaa Desta, haanja haruma lainohunni Itophiyu Pireesete uurrinshara uyno xawishshinni; haanju harumi gobbate gedeno ikko qoqqowu deerrinni haammata horo aannoho. Kunino, bushshu hoshooshamannokki gede gargarate, laalo latisate, malawo malawatenna saada xiikkatenni laalchimmankeranna lophonkera qara ikkinoti halaaleho yiino.
Haanju haruminni baalante gobbate qarqarira haanja uddisiinsiro laalchimma lophitanni dagganno. Qansootu diishsho malawatenna saada xiikkatenni ledote miinji horo dagganno gede assanno. Qansootu laalo qooxeessinsara ikkadu waaginni afidhanno gede kalaqanno yiinohu Kalaa Desta; xaphi assine la`niro haanju harumi loosi miinjaho jawa qeecha afi`rino yiino.
Sidaamu Qoqqowira haanju harumi looso hananfi yannanni kayise, xaa geeshsha mitte biliyoone ali chigginye kaasa dandiinoonnita xawise; kaansoonni chigginye mulluugicho ikkino qarqara dubbunni diwatenni sae, miinju horono uytanni noota buuxisino.
Qoqqowaho hawadi yannara 300 miliyoone ali chigginye kaansoonnita qaagiissinohu Pirezidaantichu; chigginyete kayishshi yannara daga assitino beeqqo amandoonni mixo jeefo afidhanno gede jawa dhuka ikkinota hasaawino. Albaanni dagganno agannara tenne kaansoonni chigginye awuunte lossate daga qeechansa fultanno gede woshshatto assino.
Konni dirinnino 300 miliyoone ali chigginye kaasate xaanni qixxaawo hananfe hee`noonnita kulinohu Pirezidaantichu; konnirano xaanni hananfe chigginyete sircho beehate qixxaawo assinanni hee`noonni. Sidaamu Qoqqowi qarqari haammatu dubbunni diwaminoho; weese, bunu, awukaado haammate afantannoha ikkanna, konne awuunte latisate aana illachiinshe loonsannita huwachishino.
Qoqqowoho kaansoonni chigginye awuutate qote qoteho, mittu mittunku qaesira noo fano baycho hattono gatesi dikkote waaga afidhino laalonna woloota chigginye kaasatenni miinju horaamimma lossate loonsannita Pirezidaantichu qummeessino.
Abrahaam Saamueel
Bakkalcho Wocawaaro 24, 2016 M.D
