Addis Ababa: – Ninke hasi`neemmohu biifinonna seesasallicha ikkinoha Itophiya loonse ilamate ragisiisate yee Xaphoomu Ministerichi Abiy Ahimed (Dr) xawisi. Xaphoomu Ministerichi Jimmu Zooneranna Wodiidi Galchimi Itophiyi Qoqqowira leelle latinsanni hee`noonni pirojektuwa towaanyo assino.
Xaphoomu Ministerichi Abiy Ahimed (Dr) sunfe loonsannita “Gebeta le-tiwulid” pirojekte lainohunni assino hasaawinni, ninke hasi`neemmohu biiffinonna seesallitte ikkitino Itophiya loonse ilamate ragisiisate. Konnirano, sa`u yannara loonsoommo loosi guma laalanna la`noommo. Konne dirono haammata pirojektuwa maassantanno; haaro pirojekteno hananfanni yiino.
Qeelletnni, gumunni, seyootenni qinawatenninna kaajjillunni loosu sufanno yiinohu Xaphoomu Ministerichi, Itophiyaho roorenkanni loonsannihu turzizimete daa’’attora ikkannohu haammatu baychi no. Baychuno boodu manni wolqa karsiniro haammata Itophiyu manna naaxxisiissanno yee; loosu kaayyonnna gangalatate ikkannota xawiisno.
Jimmu Quchumi Haaru “Gebeta le tiwulid”pirojektera doorroonni baychi giddo mittoho yiinohu Xaphoomu Ministerichi Abiy (Dr), kuni baychi lamunna sasu diri gedensaanni biiffannoha ikkanno. Jimmu Gebeta Ilamate pirojekte quchumu biinfillenna hee`nanni heeshsho jawu garinni soorrannota coy`rino.
Xaphoomu Ministerichi xawishshi garinni, tenne xa loonsanni pirojekte ledo xaadinse loonsiro, Jimmu qarqari ibbiinoha ikkinohura kaansanni muro rahotenni lophitannota xawise, tenne kaayyo horoonsi`ratenni Jimmu teessaano haqqu ogimmansa kalaqamu jiro ledo xaadisse qarqara biifissate loosa hasiissannonsa yiino.
Mizaani Amaanira loonsanni hee`nooni haaro riizoortenna Koyishu qarqarira loonsanni hee`noonni pirojekte Jimmu quchumira mule afantanno yiinohu Xaphoomu Ministerichi, konne xaadisa dandiiniro xaphoomunni gumamma ikka dandiinanni yiino.
Konninni sufe Xaphoomu Ministerichi Wodiidi Galchimi Itophiyra leelle towaanyo assi woyte xawisanni, qooxeessaho noota kalaqamu jiro garunni afatenni, horoonsi`ratenna agaratenni ilamate ragisiisate looso loosa hasiissannota xawisino.
Xaphoomu Ministerichi Wodiidi Galchimi Itophiyi Qoqqowira Beenchi Shekko Zoonera leelle towaanyo assanni, hiittenne gobbate kifilla doyne la`neemmo yannara kinsoonnikkiti jiro no. Tenne jiro garunni afatenni, horoonsi`ratenninna agaratenni ilamate ragisiisa hasiissanno.
10 heektaare ikkanno buna kaansoonni Babbaqa lawishsha asse kulinohu Xaphoomu Ministerichi, boodu diri albaanni mitto kuntaali bunu callu laalino; xa loonsoonni loosinni dooramino sircho woyeessatenni mitte heektaarenni 10 kuntaala buna laashsha dandiinoonnita kulino.
Konne ikkeenna, Zoonete malawu, qundo barbarre, irde, gommu haqqenna culqu hattono wolootta jiro noota xawise, qarqara investimentetenna turizimete hosiisatenna dagate heeshsho soorrate dandiinannita qummeessino.
Illenke fanne noonke jiro la“a hoongummoro horoonsi`ra didandiineemmo yiinohu Xaphoomu Ministerich Abiy (Dr), gobbasi afinbokkihunna jirosi garunni horoonsirinnokkihu mullawa raatawanno. Konnira, Itophiyu daga noonke wolqa xaadinse halamme gobbanke afate, qarqarinkera noo elto garunni horoonsi`rate hixamanyine agara noonke yiino.
Noonke egenno, jironna yanna horote aana hosiinse jireeynanke buuxisiisate dandisiisannohu injiinohu coy noota huwatatenni, laooshshu soorro abba hasiisannota caakeesse, qarqaraho noota kinsoonnikki jiro huwatino qansichi mimmitu ledo xiiwamate yanna noosikki daafira, noonketa jiro loosu aana hosiinse daganke heeshsho woyyeessate jawaata noonke. Mootimmano qarqaraho noo kalaqamu jiro horo uytanno gede assate hixamanyite loossanno yee huwachishino.
Xaphoomu Ministerichi konne loosate wodana gmba assa hasiissannota xawise, haammatu loosa hasiissanno loosi no; ikkollana jawaante loosatenni soorro abba hasiissannota lede xawisino.
Abrahaam Saamueel
Bakkalcho Wocawaaro 24, 2016 M.D
