Addis Ababa:- Itophiyaho haanju harumi mixonni xaa geeshsha 32.5 biliyoone chigginyubba kaasantinota IFDR Xaphoomu Ministirichi Abiy Ahimed (Dr) buuxisi.
Xaphoomu ministirchi Abiy Ahimed (D/r) haanju harumi laynki gafa umi diri jeefote amuraati tenne lamala giddo Oromiyu qoqqowi Soojjaati Shewa zoonera Loome woradi Jogo la ayyote harinsanna assino hasaawinni; baalanti Itophiyu daga qooxeessase haanja uddisiisate haqqe kaasa calla ikkikkinni, sagalenna xagicho kaasa, xeena woshsha, malawo batisa, saadate ikkado sagale qixxeessanna bushshu hoshooshama gatisa ikkinota huwattara hasiisannota xawisino.
Oosonkera tareessate noonke jiro giddonni qaruudde baattonke, kalaqamu jironkenna co`icho waynkeeti yiinohu Xaphoomu ministirchi; tenne jiro ilamate tareessate ninke Itophiyu daga halantino cigilenni jawa dhagge loonsanni hee`noommo yiino.
Laynki gafa umi diri haanju harumi amuraatinni 7.5 biliyoone chigginyubba kaasantinota xawise; haanju harumi amuraatinni xaa geeshsha 32.5 biliyoone chigginyubba kaasantinotano egensiisino. “Kuni kalqete leelle egenninokki; maattotenni, gambooshshunni, songotenna awalle gamba assi’rate gobbaanni konni deerrinni loosunni Investe assitinonna loosunni qaafo adhitino gobba dino’’ yiino.
«Haanju haruminni Itophiyu balaxaanchonna lawishsha ikkino looso gumultino; lamunku gafinni haanju harumi amuraatinni 50 biliyoone chigginye kaasateeti mixi`noonnihu; xaara gatino sasu diri noonke; diru dirunni 5 woy 7 biliyoone chigginyubba kaansummoro mixi`noommohunni ale gumulsha borreessiisa dandiineemmo»
yaanniiti Xaphoomu ministirchi coyi’rinohu. Haanju harumita mixo gumulate baalanti Itophiyu daga sa`u onte dirrara leellinshoommo jawaante, loosu kakkaooshshenna guma mootimma addintanni ayirrissanno yiino.
«Xa hee`noommo bayichi shoolunna sasu diri albaanni halallahonkanni yiinohu Xaphoomu ministirchi Abiy (D/r); konni woradinna qooxeessu daga boode dirra giddo qooxeessa haanja assa dandiitino; xaano qooxeessanke haanja assanke, bushsha agaranke, bunu, laalotenna shaete darchi latishshanke kaajjinshe sufa noonke» yiino.
Itophiyu Jireenya buunxeemmohu bushshanke, waankenna baattonke agaratenniiti yee; Itophiyu dagati jawaata anguwa kaajjillunni dhagge loosa suffino; jeefinsoonni hawadi haanju amuraatinni mixi`noonnihunni ale gumulle 7.5 biliyoone chigginyubba kaasa dandiinoommo yaanni coyi`rino. Xaphoomu ministirchi xawishshi garinni; haanja haruma mixi`noommohunni balanxe gumulleemmo, Abbay kofattono gumulleemmo.
«Qamadetenni hananfe maatete Jireenyinni yaano Lukkuwunni, maalunni, adotenni, quuphunni hexxo uyitanno loossa gumulantino; aantanno dirrara Itophiyu giddo Qamadete batinyinni kainohunni daabbo, Lukkuwu batinyinni kainohunni qole maalu waagi muxxe ikkinokki gobba kalaqate noonke ajuuja gumulleemmo» yiino.
Ninke Itophiyu daga haanja harumi gedeeha hagiirsiisanno looso loonsammora; Itophiyunnita buximatenna huucci’rate dhagge leeltanno dhaggete eronni Jireenyu doogo widooge massinammora eeggatena yeemmo yaanni woshshatto shiqishino.
Itophiyu hanaffinota Jireenyu harinshonna duuchu handaari soorro kaajjishate harinsho uurrissara dandiitannoti uullate aana hiitti wolqa nookkita xawisinohu Xaphoomu ministirchi Abiy (D/r); oosonkera biifado gobba tereessineemmo; konnirano jawaantenna kaajjine loonseemmo yiino saysino.
Abbebech Maatewoos
Bakkalcho Wocawaaro 10, 2016 M.D
