Addis Ababa:- Sidaamu qoqqowi 2016 haaro diro korkaata assatenni 1 kume 205 seeru seejjamaanora maaro asse tirinota Qoqqowu Farcote Biiro egensiissu.
Qoqqowu Farcote Biiro Sooreessinna maarote boorde gambisaanchi kalaa Mato Maaru xawisino garinni; qoqqowu keerenna ga’labbo buuxinse loosohonna heeshshote injiinoha ikkeenna baalunku qansooti doodhite heedhannoha assatenna farco buuxisiisate loonsoonni loosinni jaddotenni kassasantinore 7 kumi ali jaddaaleeyye muro afidhe Yirgaalametenna Hawaasa seeru seejjo mine afantanno.
Gobbatenna qoqqowu bayiriidi seerinni maarote fajjanno lallawi garinni 1 kume 205 ikkitanno seejjamaanora qoqqowu saote komite pirezidaantichaho shiqishsheenna fajjo afidhino kaiminni maaro assinoonninsa yinoonni.
Maaro assinoonninsa seejjamaano mereerinni 12 ikkannori meento ikkansa qummeessino.
Seejjamaanono loossino jaddonni dagoomanna gobba gawajjansa ammante saote ku’laato shiqishansa coyi’rinohu kalaa Mato; seejjote mininni fulte dagoomu ledo karsantanno woyte miiccino daga egennonsanninna wolqansanni owaatatenni kiisate qaalu sheemaate e’inota xawisino.
Maaro assinoonninsa seejjamaano shotunni dagate ledo araarante karsantanno gede eeliidi tantanora noo massagaano qeechansa fultanno gede huwachishinohu sooreessu; qoqqowu daga noonsa naaxxisiisanno budinni maarotenni haadhensa wolaphotenni millissanno gede assa hasiissannonsata qaagiissino.
Jaddote akkimalimma dagoomaho rosiisatenni baalunku qansichi jaddote assootinni qorowamanno gede maaro assinoonninsa seejjamaano luphiima qeecha fula agarantannonsata lede sokkasi sayisino.
Gaazeexu odeessaanchinni
Bakkalcho Wocawaaro 3, 2016 M.D
