Addis Ababa:- Itophiyu daafira konni aleenni hasaawa hasiissannonke yanna xaati yitinno Addis Ababu quchumi kantiiba dukko Adaanech Abeebeti. IPU qixxeessitinno” Itophiyu daafira” ba’re aana ka’ino hedo gobboomu amaalammete komishiinera e’’o ikkitannota kantiiba Adaanechi xawissino.
“Addis Ababu Itophiyu lawishsha” yaanno uminni qixxeessinoonni 14ki “Itophiyu daafira” faajjete hasaawunna fotote leellisho tenne lamala sayinsete muuziyeemeranna mesqel Adde baabayete harinsoonni.
barraho hasaawu ba’re aana afantinoti Addis Abebu quchumi kantiiba dukko Adaanech Abbebeti coyidhanni; hasaawunni tidhamannokki qarri nookkihura Itophiya la’anno hajo aana hasaawanna macciishshama hasiissanno.
“Hasaam bummoro roorenkanni egennammeemmo; gobbanke jiroo’minseemmo” yitinnoti dukko Adaanechi; Itophiyu daafira hasaambeemmo oyte baalanka eessannosi yaa noonke yitanni coyidhino.
Hedo noo’ne baali Itophiyu daafira yitine uyiyyenke; ninkeno kaa’litannota adhine qineessine horonsi’neemmo yitinno.
Addis Abebu yannaasincho ikkate dodanno quchuma ikkasinni hedotenni, hasaawahonna mimmito dandaatenni loonsanni loossa irkisannota egensiissino.
I.P.U qixxeessitinnoti ”Itophiyu daafira” hasaawu ba’re gobbate gede kaa’litannonke hedo burqitannote yitinnoti dukko Adaanechi; Itophiyu daafira ba’re gobboomu amaalammera e’’o ikkitanno hedo amaddinote yitinno.
Dukko Adaanechi xawishshi garinni; I.P.U Itophiyu daafira ba’renna ba’rete aana ka’anno hedo gobboomu amaalammete komishiinera e’’o ikkitannote;; konnira ba’re yannannitenna hasiissannote.
“Itophiyu daafira” yaanno umi giddo Addis Abebu Itophiyu suude ikkasi buuxxanno ba’re ikkitanno; “Itophiyu daafira” ba’re qixxeessitinno Itophiyu Pireesete Uurrinshara galata shqishshino.
Ba’re Addis Abebaho gumulamase Afriku lawishsha ikkasenniiti yitinnoti Kantiiba; gobboomu sumimmera iillinanni hajo aana loonsanni hee’noonnita qummi assitino.
Kantiiba kayissino garinni; Addis Abebu Itophiyu lawishshimmasi luphi assate wo’naalanni afamanno. Teesaanono mittimmatenni gotti yaate sharrantanni afantanno; kuni gumi techoha calla ikkikkinni aantino ilamano beeqqitannoho.
Umbeemmohu mitteenni ikkinonte gede lophinummoro horonsi’neemmohuno mitteenni ikkinota afa hasiissannonke yitanni kantiiba Adaanech Abeebeti huwachishshino.
“Konnira woyyaawino loosira irkisama hasiissannonke” yitinnoti kantiiba; noo qarra mitteenni sharrammanni Addis Ababu aana loonsanni hee’noommo yitanni coyidhino.
Itophiyu pireesete uurrinsha qaru loosu gumulshaanchi kalaa Geetinnet Taaddesehu isi widoonni; Itophiyu daafira ba’re qixxeessate hendoommohu qarunni mittimma kaajjishateeti yiino. Qeellenke aana sumuu yaatenna qarra sa’nanni hedo abbate hattono sumuu yaate hedatenniiti yaannino guwursino.
13 quchummara Itophiyu daafira qixxeessinummo yannara hedo abbitinorinna mitiimmate giddoonni heedhe afantino baala galanteemmo yiinohu kalaa Geetinneti; loosinkera luphiima kaa’lo assino Addis Ababu quchumi gashshootira galata shiqishino.
Itophiyu daafira faajjete hasaawi aana qoqqowu Pirezidaantooti, Federaaletenna Addis Ababu quchumi jajjabbu loosu sooreeyye, daddalaano bissa riqiwamaano, amma’note annuwi, gobbate geerrinna koyisanti wosinna afantino.
Qiddist Gezaheny
Bakkalcho Fooqa 2, 2015 M.D
