Addis Ababa:- Gobba ammanamoo shshunni owaata heeshshote dirinni jawa baraarsha ikkasi xaphoomu ministirchi dokiter Abiy Ahimed coyi`ri.
Xaphoomu ministirchi dokiter Abiy Ahimed; gobbansa 38 dirra ale owaattino Federaalete uurrinshuwa loosaasinera afamishshanna baraarsha baraasino.
Amuraatu aana 38 dirra ale gobbansa owaattinori ambaasaadder Girma Birru, ambaasaadder Taayye Atsiqesillaasehunna kalaa Tekileweld Axinaafuhu xaphoomu ministirchinni addi baraarsha baraadhino.
Xaphoomu ministirchi tenne qixxaawo aana saysino sokkannino; maatetenni hanafe gobba owaata kaayyo ikkitinota xawisatenni owaantensanni baraassino qeechira galatino.
Konni bikkinni gobbanna daga owaata addi baraarsha ikkase xawise; “ki`ne gobba ammanamooshshunni owaata`nenni ilamate malaate`ne wortinoonnina naaxxa hasiissanno`ne” yiino.
Beroo barrinni Addis Ababaho afantanno taakisete oofaano boode yannara dagate baatooshshiweelo owaatatenni leellishshino owaataanchimma ki`ne haruma harunsansa leellishshannote yee coyi`rino.
Owaatate gumi heeshshote diri investimente ikkasinni maganye`ne ikkadimmatenni gumulatenni gobbate dancha assitinoonnire ikka`nenni Itophiyu mamooteno galattanno`ne yiino.
Itophiyu xaa yannara jifote giddo nooha ikkirono sufote keerinna jireenyise buuxame woyyino ga`a adda ikkasi digattanno yiino xaphoomu ministirchi.
Fooqa 1 owaataanchimmate barra ikke “Itophiya owaanto” yaanno uminni gobboomu deerrinni beroo barrinni babbaxxino amuraatinni ayirrisamino.
Abbebech Maatewoos
Bakkalcho Fooqa 2, 2015 M.D
