Addis Ababa:- Hawaasi quchumira kalaqantannota mooru jaddubba gargadhate daddalu uurrinshuwara hobbaatu kaameera qansanni gede gadachanno biddissi fulinota Sidaamu Qoqqowu Keerunna Ga`labbote Biiro egensiissu.
Biddissu manaadda daddalu uurrinshuwara loosu aana hosannokkita xawinsoonni. Biirote sooreessi kalaa Alemaayyehu Ximootiwoos Itophiyu pireesete uurrinshara xawisino garinni; Hawaasi quchumira afantanno mite mite uurrinshuwate qooxeessira baasa hige gongomishamaanotenna xexxerrisa moorate assootubba gumulantino.
Konninni kainohunni jaddo gargadhate daddalu uurrinshuwa hobbaatu kaameera qasidhanno gede kaa`lanno biddissa fushsha hasiissinota kulino. Kalaa Alemaayyehu xawishshi garinni; hobbaatu kaameeri Hoteellate, Hashsha kubbinanni minnara, Rosu minnara, Hospittaallate, Baankubbatenna kalqoomu Hoteellara loosu aana hosanno.
Biddissu garinni quchumu giddo afantanno daddalu uurrinshuwa uurrinshansa giddonna gobbayido la`anno hobbaatu kaameerubba qasa hasiissannonsata kalaa Alemaayyehu xawisino.
Hobbaatu kaameerubba hidhote deerrinni waaginsa luphiima ikkasinni konne biddissa manaadda daddalu uurrinshuwara loosu aana hosiinsannikkita Sooreessu xawise; qoqqowu mootimma manaadda daddalu uurrinshuwa haammatte afantanno qooxeessubbara polisete mereershuwa ijaarsitanni noota buuxisino.
Biddissu amadannonsari daddalu uurrinshuwa qasidhannohu hobbaatu kameeri shoolunku raginni 500 meetire xeertinyi aana noo ikkitubba lede la“a dandiissannore ikka noonsata kalaa Alemaayyehu huwachishino.
Hobbaatu kaameerra qasama ga`labbote bissa nookki yannara gumulantanno jaddubbanna xawo ikkitinokki moorubba gargadhate kaa`lannota kalaa Alemaayyehu lede qummeessino.
Abbebech Maatewoos
Bakkalcho Woxawaajje 25, 2015 M.D
