Hawaasa:– Sidaamu Qoqqowi Rosu Biiro, 60 ikkitanno layinki dirimi rosu minnara kompiwuterete gatamarsha assinanni hee`noonnita xawissino.
Rosu Biiro Layinki Sooressinna Rosu Budi Qixxaawonna Tekinolooje Halashshate Handaari Sooreessi Kalaa Miliyooni Yossihu xawisanni; tekinoloojetenni irkinse rosaanote isilancho roso aate illachiinshe loonsanni hee`noonni.
Konne kaima assine 60 ikkitanno layinki dirimi rosu minnara kompiwuterete gatamarsha assinanni hee`noonnita egensiisino. Biiro, qoqqowoho shoole zoonnaranna Hawaasi quchumi gashshootira afantanno 60 ikkitanno layinki dirimi rosi minnara kompiwuterete gatamarsha assate looso loonsanni hee`noonnita egensiissino.
Kalaa Miiliyooni xawishshi garinni, qoqqowoho xibbuunni 95% ikkitanno rosi minna mootimmannita ikkasenni 7ki kifilenni hananfe ICT roso uynannita coyi`re, 2016 rosu diro layinki dirimi rosi minnara tekinoloojetenni irkinse woyyaawino roso aate mixo tunge loonsanni hee’noonni.
Kiirotenni 10 ikkitanno rosu minnara ICT mereersha assate looso loonsoonnita qaagiissinohu Kalaa Miiliyooni; 30 Layinki dirimi rosi minnara nabbambanni mini maxaaffa nabbawate kompiwuteretenni horosidhanno gede assinoonni; 13 rosi minnara mitte serverenni 80 kumi rosaano kumpiwutere horosidhannota gatisate loossano loonsanni hee’noonnita kulino.
Tekinolooje horoonsi`rate widoonni, mitu mitu qooxeessira caabbichu murmurama, rosaanonna rosiisaano tekinolooje horoonsi`rate widoonni noonsa laooshshu qarrinna hajo la’anonsa bissano konne looso ajishshe la’’ate qarri noota bandoonni yiino.
Mitiimma tirtanno kompiwuterra gatamarate hattono ogimmate irko assatenni ikkadimmate aana leeltanno foonqe beeshshate gatamarshu looso loosate IFDR Rosu Ministeere irko assitanno ogeeyye gaantinote ledo halamme rosu dirira xaaddanno mitiimmuwa gatisate loonsanni hee’noonnita sooreesu lede buuxisino.
Rosaanonniha borreessanna nabbawate dandoo boowirsate aana loosate sumudantino pirojekitenni rosaanote guma woyyeessate; ikkaddanna egennaamma, hattono bilchaattanna heewisamaano rosaano kalaqate loonsanni hee’noonnita sooreessu coyi’rino.
Rosu massago woyyeessate aana illacha tunge loonsannitanna dagoomuno handaaraho beeqqaancho ikkatenni amandoonni mixo jeefo gansiisa agartannonsata soreesse lede sokkasi saysino.
Gaazeexu Odeessaanchinni
Bakkalcho Woxawaajje 25, 2015 M.D
