Addis Ababa:– Haanju harumi mixonni sa’u onte dirra giddo 700 kume ikkanno qansootira loosu kaayyo kalanqoonnita Gibrinnu ministere egensiissu.
Gibrinnu ministere kalaqamu jiro latishshi agarooshshinna horonsi’rate loosu gumulsiisaanchi kalaa Teferi Taaddese Itophiyu Pireesete Uurrinshara xawisino garinni; xaa geeshsha haanju harumi mixonni 700 kume ikkanno qansootira loosu kaayyo kalanqoonni.
Itophiyu haanju harumi mixo hanafisiisse loosu giddora e’unkunni tayxe ontikki diro amaddino yiinohu kalaa Teferi; tenne dirra giddo kalaqamu haqqe, dubbunna gummate haqqenna wolootta kaashshuwa latinsoonnita coyi’rino.
Mixotenni xaa geeshsha noo yanna giddo 30 Biliyoone chigginyuwa kaasantino. Kaansoonni chigginye qixxeessate, bale umate, kaashshunna awuutate loosi hattono amadisiisantino loossara qansootu beeqqitanno gede assinanni hee’noonni yiino.
Kalaa Teferi xawishshi garinni; batinyu qansooti haanju harumira hosannoha mu’rote sircho shiqishatenni, chigginyete mereershubbara qaxarante loosate kaayyo afidhino.
Ledoteno, chigginyuwa hiratenna babbaxxitino bushshunna wayi agarooshshi loossara beeqqatenni eonsa lossidhino qansooti hee’ransa qummeessino.
Itophiyaho batinye looso hooggino wedelli hee’ransa bikkinni aanteteno haanju harumi mixonnino jawa mannu wolqa bobbaasatenni loosu kaayyo kalaqo kaajjisha hasiissannota huwachishino.
Loosidhe galtinori gummate laalo saga’latenni ledote hirte woxe afidhanno; kunino loosoho kakkaooshshu hee’ranno gede kaa’lanno yaanni huwachishino.
Poletiku massagaano kakkaooshshi, dagoomu fajjaaleessimma, gobbate qooxeessu agarooshshinna kalqoomu uurrinshuwa irko haanju harumi gumulora injoo kalaqqino yaanni coyi’rino.
Haanju harumi latishshi qooxeessu agarooshshi Kaarbene hirre eo afi’rate dandiisiissanno loossa kalqoomu uurrinshuwa ledo gumulantanni afantannotano lede xawisino.
Qiddist Gezaheny
Bakkalcho Woxawaajje 25, 2015 M.D
