Addis Ababa:- Itophiyu Onte miila gobbuwa (BRICS) gaamo karsamase poletikunnitano ikkito miinju xiiwo ajishate noose kaa’lo luphiimate yiino Hawaasi Yuniversite Ikonomiksete rosu goli rosiisaanchinna xiinxallaanchu Dr. Wogene Maarqoosi.
Gobba womaashshu irko hasidhuro nafa hasidhino irko seeru xiiwo nookkiha afidhara dandiitanno kaayyo heedhannotano xawisino. Itophiyu Piresete Uurrinsha ledo bilbilunni hasaawa assinohu Dr Wogene Maarqoosi; BRICS miilla gobbuwa uminsata haaro Latishshu Baanke uurrisidhino daafira womaashshu irko hiittenne seeru xiiwonni keeraa’mino garinni afi’rate kaayyo heedhannonsata coyi’rino.
Miilla ikkitino gobbuwa ledo daddalu sumimme heedhanno daafira, wolootu miilla gobbuwa ledo heedhanno sumimme garinni gobbayidi Investimente lossate injoo kalaqantannota qummeessinohu xiinxallaanchu; konninni, xaa yannara luphi yiino deerrinni leeltannota gobbayidi woxu soorro anje gatisate jawa qeecha fultannota ammannanni yiino.
Hattono Itophiyu roore anga dagate kiiro amaddannori wedella ikkansanni tenne mannu wolqa garunni qajeelsine miilla gobbuwara soyaate injoo heedhannota qummeessino.
Gaamo karsammanni woyte horo calla ikkikkinni jawa yawo heedhannota qaagiissannohu Dr Wogene; ninke gobba garinni la’nanni woyte woxunnino ikko noose kalaqamu jironni hattono wole kalqete gobbuwanni baxxitannota assannoserichinni dhukase leellisha agarantannose; konnirano, hasiissanno qixxaawo assa nooseta huwachishanno.
Itophiyu, Afriku mittimma ofollo ikkasenni Afrikano ikko baxxinohunni Soojjaati Afrika milli assatenna miinjunni horonsi’raancho ikkatenni beeqqo assa; laalchono isilanchimmatenni laashshite miilla gobbuwara soyaate kaayyo heedhannosehura qixxaawo assa hasiissannota qaagiissino.
Poletiku ragaannino ikkiro Itophiyu jawa halamaanchonna hexxo tunganni gobba ikkasenni ledote BRICS miila ikkasenni kalqeteno luphiima xiiwo kalaqate dhuka afidhanno kaayyo heedhannota Dr. Wogene lede xawisino.
Qiddist Gezaheny
Bakkalcho Woxawaajje 25, 2015 M.D
