Addis Ababa:- Itophiyaho hiittenneno poletikunnita ikkito danchu gashshooti hajubba hasaawunninna amaalamatenni tira dandiinannita Gobboomitte Amaalamme Komishiine egensiissu.
Itophiyaho gobboomitte sumimme kalaqatenna mittimma kaajjishate 11 miilla hanqaffino komite tantanne loonsanni hee’noonni. Gobboomitte amaalammete komishiine gambisaanchi Pirofeeser Mesfin Ariaya Itophiyu pireesete uurrinshara xawisino garinni; gobbankera hiittenne hajubbano hasaawunninna maalamatenni tira dandiinanni.
Poletikunnita ikkito danchu gashshooti xa’mubbanna qarrubba hiittenneno dagoomu bissa beeqqaano assatenni qarrubba tira dandiinanniti ammano nooe yiinohu Komishiinete gambisaanchi; qarrubba tirate malu urde kaysa ikkikkinni qarunni amaalammete yiino.
Qodhine sharramatenni mannu lubbo ba’anno; bisu gawajjo iillitanno; jajju ba’’anno. Rumuxxite keeshshitino buxima aana jirsa karate assinanni sharro aana olu roorenkanni buximate reeqecci yinanni gede assannota gambisaanchu huwachishanno.
Techo qeelaancho ikkinohu ga’a qeelamannota seekkine huwatanna olunni jajjunna mannu lubbo ba’’ate gobbaanni tirfi’nanniri nookkita anfe hiittenne hajono dagate gede hasaambe tira bilchaante ikkitinota qaagiissino.
Gobboomitte amaalamme duuchunku qooxeessira yinoonni yanna giddo harinsannitanna hiittenneno dagate bissa beeqqaanonna assitannote. Keeru booraambe kalaqantino qooxeessubbarano qawwentenni roore amaalammete harinsho huwatatenni qodhite sharrantannori hasaawaho shiqqanno yine hendannita kaysino.
Baalunkuri hasaawunni tidhamanno yitanno ammano nooe. Qasiisote hajono ikkito meessaneete gashshate, farcotenna poletiku hattono danchu gashshooti xa’mubba baala garunni hasaambe amaalammiro tidhama dandiitannokki korkaati dino yaanno; pirofeeser Mesfini.
Gobbate geerri, baxxinohunni amma’note annuwi konni albaanni assitunte gede amuwuno dandaaminsa garinni oosonke qawwe kaysa agurte qarrubba tirate mootimmate bissawa shiqqe hasaabbanno gede xiiwo assitara xa’meemmo yiino. Amadisiiseno, gobbate geerri araarsatenni, ammannote annuwi kayinni ayyaanaame huuccattonsanni kaa’litannonke gede xa’mi’reemmo yiino.
Amsaalu Felleqe
Bakkalcho Woxawaajje 25, 2015 M.D
