Addis Ababa:- Gobboomu deerrinni ijaarroonniti way uurrinshuwa dagoomaho hasiissanno horo uytanmo gede assa hasiissannota Wayinna wolqate ministere egensiissu.
IFDR Wayinna wolqate ministere woshshamaano uurrinshuwa, qoqqowubbate wayinna wolqate biironna hajo la’annonsa bissaha 2015M.D handaaru loossa mixote keeno Dagate riqiwamaano amaale mini wayi, gorsunna gammoojjaame qooxeessuwa hajubba uurrinshu komite leeltinowa Woxawaajje 19-22/2015M.D geeshsha Addis Ababaho Sayinsete Muuzeemera harinsoonni.
Wayinna wolqate ministirchi Injiiner Habtaamu Ittefa (Dr.) tenne yannara coyi’rino garinni; gobboomu deerrinni quchumaho ikko baadiyyete qooxeessubbara xalalu anganni way iillisho yanna yannantenni lexxitanni daggino.
Caabbichunna doorshu wolqa handaarinnino dagoomu horonsi’raanchimma lossate hixamanyine loonsanni hee’noonni. Ikkollana, duuchante qooxeessubbara dagoomaho hasiissanno horo uytanno gede ijaarroonniri way uurrinshuwa hegeraame horo aate ragaanni qarrubba noota Ministirchu xawisino.
Konnirano korkaatu, way uurrinshuwa ijaarre maassiinsi gedensaanni hasiisanno agarooshshe assa hoogate kaima ikkinota kule; uurrinshuwa seeda yannara horo uytanno gede dagoomu annimmatenni agarooshshe assa hasiissannota huwachishino.
Itophiyaho baadiyyete ikko quchummate qooxeessubbara qansootu kayissanno xa’mubba mereerinni xalalu anganni wayinna qooxeessu co’ichimma qara hajooti yiinohu Ministirchu; handaarunni qoqqowubbate ledo qinaambe gummaamma loossa loonsoonnita egensiisino.
Konni garinnino, 6.2 miliyoone qansoota xalalu anganni way horaameeyye assa dandiinoonnita kule; kunino, albaanni horaameeyye assinoonni qansooti kiironni ledo xaphoomunni 70.5 miliyoone iillishannota qummeessino. Qooxeessu co’ichimma ragaannino 1.2 miliyoone qansooti co’itte shumate minna horaameeyye ikkitanno gede kaayyo kalanqoonni yiino.
Gobbankera babbaxxitino qooxeessubara hananfoonniti way uurrinshuwa ijaarshi loossa murroonni yanna giddo ijaarante goofa hoogate qarrubba xaaddinonke yiinohu Ministirchu; konnirano korkaatu uurrinshuwa ijaartanno kontiraakiterooti dhuki anje; pirojekituwate loossa garunni harunsa hooga; babbaxxitino qooxeessubbara ga’labbote booraambe hattono gobbate gede gobbaydi woxu soorronni eessinanni uduunni hasi’noonni yanna giddo shiqa hoogate qarra ikkinota qummeesse; albillicho taashshote qaafo adhinanni hajubba ikkansa kulino.
Wolqate handaarinnino baadiyyete 1.4 miliyoone qansooti Soolaarete wolqa, Bayogazetenna co’itte sagale raisi’nanni tekinoloje handaarinni hattonni 1.4 miliyoone xaphoomunni 2.8 miliyoone qansoota horaameeyye assa dandiinoonni.
Quchumahono hattonni tayxe dirinnino 350 kume qansoota caabbichu horaameeyye assa dandiinoonniha ikkanna; sai 2014M.D hanafe xaphoomunni 4.65 miliyoone dagooma horaameeyye assa dandiinoonni yiino.
Gobboomu deerrinni xalalu anganni way horaameeyye ikkitino qansooti kiiro sai 2013M.Dra 4 miliyoone, 2014M.Dra 5 miliyoone, hattono tayxe dirinni 6.2 miliyoone ikkanna; 2016M.D hattonni 6 miliyoone ale ikkitanno qansoota ledotenni horaameeyye assate mixi’noonnita Ministirchu Injiiner Habtaamu lede xawisino.
Amsaalu Felleqe
Bakkalcho Woxawaajje 25, 2015 M.D
