Addis Ababa:- Yirgaalamete Qinaawino Agiro-Industire Paarke 2015M.D gobbara sonkoonni laalchinni 2.2 miliyoone doolaare eo afidhinota xawinsi. Paarke 56 mittimmate loosi maamarra hundaanni noo millara 140 kume baatto loosidhe galtino dagara dikkote xaadooshsheno kalaqqino.
Sidaamu Industirete Paarke Latishshi Korporeshiine Biizinesetenna Latishshu Dayrekitere Kalaa Pheexiroosi Maarqoosihu Itophiyu pireesete uurrinshara xawisino garinni; Yirgalamete Qinaabbino Agiro- Industire Paarke loosu wiidra e’u kawa sase diro kiirsiissino. Industirete paarke sai 2015M.D 2.2 miliyoone doolaare ale eo afidhino.
Loosu giddora e`inori shoolu kubbaaniyi qooxeessaho baatto loosidhe galtino dagara dikkote xaadooshshe kalaqqanni noota caakkeeesse; xaa geeshsha 5 kumi 462 qansootira uurrinshunna yannate geeshshi loosu kaayyo kalaqqinota xawisino.
Saiha sase diro loosu giddora e`ino kubbaaniyooti laalchonsa gobbara soyaatenni 8.7 miliyoone Ameeriku doolaare eo afidhinota xawisinohu Kalaa Pheexiroosi; paarke gobbate giddora ikkanno laalcho ado, shaqqado agatto haammachiishe laashshitanni dikkote shiqishshanni noota xawisino.
Dayrekterichu xawishshi garinni, Industirete paarke wo`mu dhukisenni loosu widira e`anno gede assate babbaxxitino gobbuwara egensiisate looso loonsanni hee`noonni. Safaraancho wonshitinori 26 ikkitanno kubbaaniyi loosu widira eate agadhite no. Albillicho Industirete paarke 150 kubbaaniya adha dandiitanno.
Dureeyye loosu giddora e`annokki gede asse danqara ikkinohu gobbate fayinansete seeri fajjanno garinni baanke liqoo rahotenni aa hoogate yiino. Kalaa Pheexiroosi, Industirete paarke loosidhe galtino daga laalchonsa Industirete shiqishshanno gede xaadooshshe kalanqeenna horaamimmansa lophitanni no.
Xaa geeshsha loosu giddora e’inori shoole faafirikka 56 mittimmate maamarra hundaanni tantanatino 140 kumi loosidhe galtino dagara dikkote xaadooshshe kalaqqinota egensiisino.
Abukaadote laalchinni calla 105 kume loosidhe galtino daga miilla noo mittimmate loosi maamarira dikkote xaadooshshe kalanqoonni. 2015M.D Abukaadote laalcho calla 5 kume 800 toone dikko shiqinshoonniha ikkanna; shaqqado agatto lendeenna gobbara sonkoonni laalchinni 2.2 miliyoone doolaare eo afi’noonnita coyi`rino.
Paarke mittu mereershi owaante uytanni noota xawisinohu Dayrekterichu; giirate dano gargarate kaameela, fayyimmate mereersha, baanke, gumuruke qaaqquulle keeshshiinshannihunna wo`mu caabbichu wolqa owaante nooha ikkinohura dureeyye e`e latissanno gede woshshatto assino.
Abrahaam Saamueel
Bakkalcho Woxawaajje 18, 2015 M.D
