Addis Ababa:- Gibrinnu handaari sa’u sase dirra giddo laachonna laalchimma ledatenni, loosu kaayyo kalaqatenna gobbayidi daddalo lossatenni luphiima guma borreessiisinota Gibirinnu ministere egensiissu.
Tonnu diri latishshu mixo umi fooliishsho mereerima yanna jeefishshanna 2016M.D- 2018M.D geeshsha gumullanni laynki fooliishsho mereerima yanna mixo keeno tenne lamalara harinsoonni.
Ministirchu Dr. Girma Amente Itophiyu Pireesete Uurrinsha ledo assino hasaawinni; tonnu diri qara mixo worroonnihu gibirinnu handaari lopho gobbate deerrinni mereerimunni xibbuunni 6% ikkitanno gede hende qixxeessinoonnita qummeessino.
Konninni harunsine gibrinnu handaari sa’u sase dirrara xibbuunni 5.5%, 6.1%na 6.3% diru lopho aante aantetenni borreessiinsoonnita coyi’rino. Konninnino gibrinnu handaari qara mixonni worroonniha mereerima 6% diru lopho gumula dandiitinota qummeessino.
Lopho aantino dirra giddo sufisiisate dandiissanno akati hee’rasi xawisino. Gibrinnu handaarinni borreessiinsoonni gumira baxxinohunni Xaphoomu ministirchi Dr Abiy Ahimedi adhinoti haaro qaafo luphiima qeecha afidhinota kayisino.
Handaaru lophora jawa qeecha fultannori kaashshunna mu’rote handaarra ikkinota qummeesse; konnirano, qasiisote looso halashsha dandiinoonniti guma afisiissino. 2015 baajeetete dirinni 6.5 Miliyoone hektaare baatto qasiisotenni loosa dandiinoonnita qummeesse; kunino loosidhe galtinori labbanno tekinolooje, giwirinnu loosira hasiisannorenna ogimmate irko afidhanno gede dandiisiisino yiino.
Gibrinnu tekinolooje qaraxiweelo e’anno gedenna baankuwano liqoote shiqisho halashshitanno gede assinoonnihura loosidhe galtinori Tiraakteretenna Kombayineretenni gibrinnu looso loossanno gede dandiissiisinota xawisino.
Lawishshaho; 2015ni 2.9 Miliyoone hektaare baatto Tiraakteretenni loonsoonnita qummeessino. Konninni harunsine xaa yannara Biiru hayxenna qamade gobbayidinni eessa uurrinsoonni yiinohu Mnistirchu; gobbayidinni e’anno Ruuze bocu aleenni gobbate giddo laalchinni riqiwa dandiinoonni yiino. Aananno 2016 laalchu dirinni gobboomu deerrinni 17 Miliyoone Hektaare baatto loosate hendoonnitano Dr. Girma lede coyi’rino.
Qiddist Gezaheny
Bakkalcho Woxawaajje 18, 2015 M.D
