Addis Ababa:- Halantino Arebete Emireetooti pirezidaantichi Sheek Mehammed Bin Zayid Al-Nahiyani sa’u lamalara faajjete loosu towaanyora Addis Ababa einoha ikkanna;Itophiyu ledo 17 sumuummubba malaatissinotano
Pirezidaantichu Addis Ababa iilli woyte xaphoomu ministirchi Abiy Ahimed (D/r) Boole kalqoomu horophilu fooliishshora afame “Rodoo’ya Dayooe Bushshu” yaatenni iibbadu koyishshi haarinosi.
Layinki xaphoomu ministirchinna gobbayid hajo ministire kalaa Demmeqe Mekkonnini lede ministirootu, olu wolquwa xaphoomu itaamaazhoor shumenna layinki itaamaazhoor shuume, Federaalete polise komishiinere jeneraale, ministirootunna woloota luphiima mootimmate loosu sooreeyye afantinowa koyishsha assinosi; ayirrinyisirano 21 hinge medife gannoonni.
Xaphoomu ministirchi Abiy Ahimed (D/r) dagoomittete qoolisira “Muxxe rodoo`yanna jaalaya Sheek Mehammed Bin Zayid Al-Nahiyani Itophiya hawalle keerunni dayitto. Lophanni dayinohu lamente gobbuwa xaadooshshi ayirrisamatenninna gutu lophora gutu ajuuja aana safaminoho. Sufote latishsha sufisiisate ha`lamanke sunfeemmo” yee borreessino.
Xaphoomu ministirchi Abiy Ahimed (D/r) na Sheek Mehammed Bin Zayaad Al- Nahyani liukaane gaamosi amadatenni lamooshshu hasaawa assitino. Lamunku massagaano Itophiyahonna halantino Arebete emireetooti mereero noo xaadooshshi yanna yannantenni kaajjanni dayinota xawisino. Baxxinohunni lamente dagaranna dagganno ilama xaadooshshira kaajjado buussa roore gatamaarate noonsa murciraanchimma coyidhino.
Lamooshshu hasaawa harunse lamunku massagaano lamente gobbuwa mereero industiretenni, giwirinnunni, investimentetenninna fayinaanse lede assinoonni 17 sumuumme malaatisate amanyootu aana afaminota xaphoomu ministirchi borro mini mashalaqqe leellishshino.
Pirezidaant Sheek Mehammed Bin Zayid towaanyote illachino lamente gobbuwa mereero nooha lamooshshu xaadooshshe kaajjishate ikkinota xawinsoonni. Itophiyu halantino Arebete Emireetooti lamooshshu xaadooshshi muli yanna kawa lophanni dayino. Konnirano lamente gobbuwa massagaanonni assinanni loosu towaanyubba korkaata ikkitinota xawinsanni.
Itophiyu buna, ataakilte, gidu laalchubba hattono saadanna saadate gumma halantino emireetootira sokkanno woyte maashinerubba, maddaabbara, sagalimmate hosanno uduunnenna elekitirooniikisete gumma qole halantino Arebete emireetootinni eessitanno.
Abbebech Maatewoos
Bakkalcho Woxawaajje 18, 2015 M.D
