Addis Ababa:- Qoqqowoho mussinnunna bainchu assooti giddo beeqqitino yine huluullammoonnire seeru hundaanni hosiinsanni hee’noonnita Sidaamu Qoqqowi Farcote Biiro xawissu.
Qoqqowoho sa’u 10 barrubbara harinsanni keeshshinoonni 2015M.D mootimmatenna paartete loossa mixo gumulshanna 2016M.D massagaancho mixo keeno oyimbarra xaphi assatenni; moorunna bainchu assooti giddo angansa booraabbinori aana gashshootunna seeru qaafo adhinanni gede kaajjinshoonniti qaangannite.
Konni kaiminni, 97 bainchu assoottinna moorunni huluullammoonnire seeru hundaanni hosiisate kaajjinshoonni gumulonni tenne odoo qixxeessinummo yanna geeshsha 50 huluullamaano seeru hundaanni hosiinsoonnita qoqqowu Farcote biiro sooreessi kalaa Mato Maaru xawisino.
Sooreessu Itophiyu pireesete uurrinshara xawisino garinni; 50 manni seeru hundaanni hossinoha ikkanna keenote bare aana xa’mantanno gede muro sayinsoonni bissa seeru hundaanni hosiisate loosi kajje sufino. Konnirano,mootimmatenna dagate jiro moortinore seeru hundaanni hosiisate Biiro yawo adhite loossanni noota xawisino.
Biirote sooreessi kalaa Mato xawishshi garinni; 2015M.D xaphooma keenonni massagaano bainchu loosinna mussinnunni huluullammoonni bissa badate looso loonsoonni. Moorunni huluullammeenna bandoonniri Madaabbarunna Fayinaansete seeri ledo xaaddanno seerimale assootubbaati.
Qoqqowu deerrinni xa’mamaanchimma buuxisatenna mootimmatenna dagate jiro aana gumulloonni moori aana kaajjado qaafo adhinanni hee’noonnita xawisinohu kalaa Mato; buuxo gundi gedensaanni olluubbate tantanonni hananfe qoqqowu geeshsha noo mootimmate sooreeyyenna la’annonsa bissa xa’mamaano assate qaafo kaajjite suffannota buuxisino.
Mite mite jaddubba loosu amanyooti gobbaanni gumulantinorenna woxunni calla hendannikkireeti yiinohu Sooreessu; mussinnu jaddo ledo amadisiisante iillitino huno aantete qorqorre bikkasi dagate xawinsannita huwachishino.
Konni albaanni loosu sooreeyye moorunni hulluullammanninsa woyte bayicho soorrite maaxxannotanna biilloonyensa base soorrineenna suffannota qummeesse; xa adhinanni hee`noonni qaafo albitenni baxxitinotanna kaajjado ikkitinota egensiisino. Qoqqowu deerrinni, mittu deerrinni 10 manni mussinnu jaddo afanteennansa poletiku qaafo adhinoonninsatano lede xawisino.
Hawaasi quchumira fayinaansete amanyootinni luphiimu moori giddo beeqqitinori 20 ali manni sase lamala albaanni seeru hundaanni hossanno assine kisse fannoonnita qummeesse; kuri mereerinni ontu ale ikkitannori biddishshu sooreeyye ikkansa coyi`rino.
Qoqqowoho mussinnunna bainchu assootubba ledo amadisiisame 2015M.D 136 manni xa`mamaano ikkinota buuxise; buuxotenna kissete harinsho aana noo jajjabba hajubba hee’ransano xawisino.
Qoqqowu safami yannara mussinnunni co`o yino gashshooti hee`rannosi gede millimmo assinoonnita coyi`rinohu Farcote Biiro Sooreessi; baxxinohunni mussinna gargadhate gobboomu mittimma kalaqantuhu gedensaanni qoqqowoho onte miilla noose komite tantanne haammata loossa gumulloonnita xawisino.
Mussinna gargadhate loosi ledo amadisiisame eeliidi mootimma gashshooti deerri aana noo manni calla ikkikkinni xaphooma moora gumullanna sammi yaa doodhitino sooreeyye lede xa`mamaano assinanni hee`noonnita buuxisino.
Mussinnu ledo amadisiisame mashalaqqe afi`nanni woyte qorqorre xa`mamaano seeraho shiqishate loosi kaajje sufannoha ikkasinni; dagoomuno xawo fushshatenni beeqqa dandaannota lede xawisino.
Yaareed Geetaachew
Bakkalcho Woxawaajje 18, 2015 M.D
