Addis Ababa:- Sidaamu qoqqowira uyinoonninsata mootimmatenna dagate yawo mulaagisatenni mussinnunna bainchu assootira reqeccaabbino massagaano aana poletiku gumulo sayinsoonni.
Qoqqowoho sa’u lamalanni hanafe keeno assinanni keeshshinoonni. Sidaamu qoqqowi pirezidaantichi kalaa Desta Ledamo keenote bare gumulli yannara xawisino garinni; uyinoonninsa yawo garunni fultinokkirinna bainchu assooti giddo angansa wodhitino yine keennoonni massagaano loosinsa bikkinni seeru xa’mamaanchimmano ikkitannota kule; assinanni keeshshini faajjete keenonni poletiku muro sayinsoonnita xawisino.
Kalaa Desta yiino garinni; ayino hunosi bikkinni seerunni xa’mamanno. Keenonnihu qaru illachi kaajjado uurrinsha gatamarate loosu gumulshi noo deerra afatenna dagate horaameessimma buuxisiisate ikkinotano xawisino.
Qoqqowoho sa’u dirrara giwirinnunni, fayyimmatenni, rosu handaarinninna latishshu loossanni duushshanno guma borreessiinsirono; foonqubba nootano huwachishino. Mixote gumulshi aana hooffayidi guma borreessiissino handaarra aana illacha aatenni faajjete keeno assinoonnita Pirezidaantichu qummeesse; baretenni kaajjado qaafo adhinoonnitano huwachishino.
Assinoonni qorqorshinni 97 manni baxxinohunni maddaabbaru shiqisho ledo amadisiisame shoole woraddanni olluubbate murrootinni kayse loosu gumulsiisaano, latishshu loosaasine, magaaziinete agaraanonna sooreeyye lame woradu gashshaano lede dagate iillannoha gufisate konni mooru hajonni beeqqaano ikkitinore badanna xa’mamaano ikkitanno gede assa dandiinoonnita xawisino.
Sidaamu qoqqowi Jireenyu paarte borro mini sooreessi kalaa Abrahaam Marshaallo isi widoonni; mooranna baincho assoote effidhe gibbanno massagaano kalaqatenna amandoonnita latishshu harinsho kaajjinshe sufisate dandiisiissanno keeno harinsoonni yiino.
Kalaa Abirahaami,Loosinke aana leeltino foonqubba badatenni kuni assooti sufannokki gede assinoonninna uyinoonninsa yawo garunni fultinokki moorunna bainchu assootinni beeqqaano ikkitino bissa xa’mamaano assate loosi kaajje sufannoho yiino. Sooreessu lede coyi’ranni; moora sharramate loosi kaajje sufanno; dagate horaameessimma agarsiisate kaa’lanno looso loonsanni; qorqoratenna fixxate loosino kaajje sufanno yaanni duu’re worino.
Abbebech Maatewoos
Bakkalcho Woxawaajje 18, 2015 M.D
