Addis Ababa:- 10 diri latishshu mixo mereerima yanna jeefishshi keeno faasho woratenni jeeffu. Xaphoomu ministirchi Dr.Abiy Ahimed 10 diri latishshu mixo mereerima yanna jeefishshi keeno aana faasho worino.
Lame barrubbara harinsoonniti 10 diri latishshu mixo mereerima yanna jeefishshi keeno sa’u muli barrubbara jeefantinoha ikkanna; barete aana 2016-2018M.D geeshsha gumulantanno layinki mereerima mixo keennoonni.
Barete aana 2016 M.D qara qara faasho baxxinohunni xaphoomunni Itophiyu miinju loossa hiittoo suudenna amado afidhino yitanno hajo aana amaalloonnita qummeessinoonni.10 diri latishshu mixo mereerima yanna jeefishshi keenote bare Xaphoomu ministirchi Dr. Abiy Ahimed faasho woratenni gumulantino.
2016M.D-2018M.D geeshsha gumullanni layinki fooliishsho mereerima yanna mixo 9 Miliyoone qansootira haaruudde loosu kaayyo kalaqate hendoonnita Mixotenna Latishshu ministircho Dr. Fitsum Asaffiti xawissino.
Mixote dirinni umi fooliishshonni ajino jeefishshi noonsa handaarra woyyeessate mixo mixidhanno gede woyyaawino jeefishshi noonsari kayinni ledote eo heedhannonsa gede mixo amande loosu giddora e’noonnita Ministircho coyidhino.
Gobbayidi Investmentenna gibirinnu handaarinni afi’noonni gumi kalqoomunna qooxeessu garinni keennanni woyte 10 diri mixonni amandoonni eo garinni la’niro woyyaawino deerrinni jeefinsoonnita xawissino. Kalqoomu qarra harunse kalaqaminohu waagu lexxo jawiidi xiiwo ikkiturono;loosantino loossa harunsa dandiinoonnita qummeessitinno.
Kalqoomu latishshu uurrinshuwa Fayinaansete shiqisho ikkado ikkitinokkita qummeessite; dagooma kakkayisatenni womaashshu anje gobbate giddo doorshinni riqiwate sharro assinoonnita Dr. Fitsumi kayissino. Gibrinnu ledote eo tungoonni handaara ikkasi xawisse; daa’’attote, shiilotenna laashshaano handaarra kayinni woyyaambete mixo heedhannonsa gede hendoonni.
Konninnino, culku dikko 400 Toonenni 13 toonera, gobbate giddo laalchi dikkote qeechi xibbuunni 46% lossate mixi’noonnita coyidhino. Fayyimmate, rosunni, wayinni, elektirikete owaantenni qansootu horonsiraanchimma lossa hattono waagu lexxo gargara aantino sase dirra illachuwa ikkitinota xawissino.
Qiddist Gezaheny
Bakkalcho Woxawaajje 18, 2015 M.D
