Hawaasi Quchumi keerenna ga`labbo agaratenna daga keerunni flute e’anno gede assate albihunni roorsine loonsanni hee`noonnita Hawaasi Quchumi Gashshooti Keerunna Ga`labbote Biddishshi xawisi.
Hawaasi Quchumi Keerunna Ga`labbote Biddishshi Sooreessi Kalaa Mekuriya Maa’niisihu Itophiyu Pireesete Uurrinshara xawisinonte gede; Hawaasi quchumi gobbate giddo noo quchumma mereero co`ichanna biifanno quchumma ikkasinni, gobbayidinna gobba giddonni haammatu turistootinna wosinna dagge fooliishshidhannowanna turizimete mereersha ikkinota kule;keerunna ga`labbote qarri kalaqamannokki gede hixamanyine loonsanni hee`noonnita buuxisino.
Quchumu giddo keerenna ga`labbo agarsiisate loonsoonni loosi giddo daga poolisenniwa ikkikkinni; poolise daganniwa shiqqi yite dagate ledo loossanno gede assinoonnitano qummeessino.
Konne diro loonsoonni loossa giddo quchumunniti ga`labbote bissa 24 saate baala dagate hobbaate agartannonna agarsiisate loosi aana illachiishshanno gede assinoonnita egensiisnohu sooreessu; baxxinohunni daga batidhannowa, dano kalaqantara dandiitannowa, jaddo loosantannowanna tiraafikete bobbanke noo baycho baala bande poolisete mereersha ijaarre, poolise bobbasatenna roondunni agarsiisate dandiinoonnita coy`rino.
Kalaa Mekuriyi lede, quchumu giddo dancha fajjo loosi aana qajeeltinori 1000 wedelli nootano qaagiisse; kuni wedelli woloota dagoomu bissa ledo halametnni quchumu giddo baalawa keerunna ga`labbo agarantanno gedenna huluullisannorichi kalaqamiro poolisete mashalaqqe aatenni hixamanyite loossanno gede assinoonita hasaawino.
Quchumu giddo konni albaanni kalaqamannohu jaddote loosi lawishshaho mobaylenna motore moora nooha nafa ikkirono; harunsine qorichinshanni hattono Addisi Ababunni 17 ikkanno kaameela moorte abbitinnoha nafa qolate looso loonsoonni; tini jaddo tenne yannara ajjanni dagginota huwachishino.
Kalaa Mekuriy yaatto garinni, sa`u yannara Taaboori ilaali iiminni gongo`mite ubbino beetto korinni mitu mitu quchumu aana addi addi diqillo buuratenni quchumu widira giddonna gobbanni turistootu dagge daa’’attannokki gede assate wo`naaltanno bissa noota qummeesse, ilaalu aana kalaqamino coyinna tuqu xaadooshshira dudumbanni coyi halaalunni xeerti’rinoho; beettote aana iillitino gawajjo buuxo assinanni hee`noonni yiino.
Quchumu giddono sa`u yannara kalaqaminohu seennu diiri jaddo poolisete illenni tee`linoha ikkinokkitanna jaddaasine baala seeru hundaanni assine buunxanni hee`noonnita xawisino. Qoqqowunna quchumu su`ma huntannori polotiku daddalaasini konni loosinsanni eemarama noonsata kulino
Abrahaam Saamueel
Bakkalcho Woxawaajje 11, 2015 M.D
