Addis Ababa:- Gobboomu deerrinni layinki doyichonni Afuunni uyinanni Kolleeru kittiwaate qoqqowoho Wodiidi Sidaami zoonera Daarra Otilchu woradira Federaaletenna qoqqowu luphiima loosu sooreeyye afantinowa faajjetenni hananfoonni.
Qixxaawote aana hasaawa assinohu Sidaamu Qoqqowi Dagoomu Fayyimma Inistituute dayrekiterichi Dr. Daammene Debaalqe; sajjoo dirrara taraabbannonna taraabbannokki dhibbuwa balanxenna kalaqantuhu gedensaanni gargadhate aana illacha assatenni loonsanni keeshshinoonni. Fayyimmansa agarantinonna laashshaano qansoota kalaqate loonsoonni loosinni gumaamma ikka dandiinoonnitano xawisino.
Qoqqowoho 5 woraddara Kolleeru dhibbi taraawo kalaqamasenni gawajjamino manna 820 xaginseenna hurte fultanno gede assinirono 9 manni lubbaminota kule; dhibba tekinoloojete kaa`lo nookkiha gargadha dandiinannihura shumate mine garunni horonsira; meessinna qarqaru co`ichimma agara hattono co`ichimmasi agarantino woy xaginsoonni waa horonsi’ratenni gargadha dandiinannita dagoomu afe loosu aana hosiisanno gede huwachishino. Tenne doyichonni 288 kumi ali mannira kittiwaate uyinannitano lede coyi`rino.
Itophiyu dagoomu fayyimma inistituute dayrekiterichi Dr. Mesay Hayilu isi widoonni; uurrinshansa mannu loosinonna kalaqamunni kalaqantanno taraabbanno dhibbuwa gargadhatenni, fayyimmate iillo woyyeessatenni, hedeweelcho kalqantanno dhibbuwa xiinxallotenni irkisanna dawaro aa, uurrinshuwa tekinoloojete uduunnichinni irkisanna kaa`la hattono labbino assootubba aana illacha aatenni loosanni afantannota coyi`rino.
Gobbate deerrinni onte qoqqowubbara kalaqaminoha Kolleeru dhibba 41 woraddara wo`munni wo`ma uurrisa dandiinoonnita xawisino. Gobbankenni dhibba wo`munni wo`ma hunate baalunku dagoomi fayyimmate ogeeyyenna hajo la`annonsa bissanni ledo halamatenni uyinanninsa roso loosu aana hosiisa hasiissannota qummeessino.
IFDR Fayyimmate Ministere Dieeti Dr.Derejje Dhuguma kittiwaate hanafisiisate amanyooti aana leelle sayisino sokkanni; 4 na 5 dirra giddo dhibba balanxe gargadhanna xagisate aana jawa illacha tunge loonsanni keeshshinoonni. Aliyye Itophiyu qooxeessira kalaqantino moollenna lolahu danubba handaara jiffinoha ikkirono qeelletenni fula dandiinoonnita kaysino.
Xa kalaqaminoha Kolleeru dhibba gargadhate 5 qoqqowubbara 111 yannate geeshshi xagisote mereershuwa uurrisatenni loonsanni hee`noonnitano coyi`rino. Amanyootu aana Daarra Otilchu woradi gashshootinna Wodiidi Sidaamu zoone gashshooti afame dhibba gargadhate hajo la`anno bissa ledo qinaawatenni loosino loosinni sa`u 16 barrubbara dhibbu ripoorte borreessinoonnikkita xawisino.
Abbebech Maatewoos
Bakkalcho Woxawaajje 11, 2015 M.D
