Addis Ababa:- Qoqqowubbate kalaqamino kanchafare gargadhate 41 kume 500 liitire babbaxxitino kemikaalete danubba tuqissinota Giwirinnu ministere egensissu. Konne qarra gargadhate lee horophilla qixxaabbinotanna tuqinsoonni kemikaale kiiffannore 8 kaameella 11 ogeeyye ledo sonkoonnita xawissino.
Giwirinnu ministerera mu`rote agarooshshi massago loosu gumulsiisaancho ikkinohu kalaa Belayineh Nuguse Itophiyu pireesete uurrinshara xawisino garinni; Affaarete, Tigirayetenna Amaaru qoqqowira kalaqamino kanchafare gargadhate 41 kume 500 liitire babbaxxitino kemikaalete danubba tuqqino; tuqqino kemikaale kiiffanno sette yannaasine kaameelubba 11 ogeeyye ledo bayichu widira sonkoonni.
Ledotenni, qoqqowubbate kalaqamino kanchafare gargadhate 6 horophilla qixxaabbinoha ikkanna; qarru bidhachishanno deerra ikkinokkihura lame horophilla amandoonni lamala giddo kemikaale kiifate looso hanaffanno yiino.
Kanchafaru qoqqowubbate kalaqame gidu aana gawajjo iillishikkinni gargadhate babbaxxitino qoqqowubbara kemikaale tuqqinoha ikkanna; Oromiyu qoqqowira 12 kume, Amaaraho 10 kume 500, Tigirayete 7 kume, Affaarete 1 kume, Wodiidira 3 kume, Wodiidi galchimira 2 kume liitirenna wolootta qoqqowubbarano tuqisate looso loonsoonni yiino.
Qoqqowubbate kalaqamino kanchafari gidu aana gawajjo iillishannokki gede assinanni gargadhate loosira ikkado kemikaalete kuuso hooggurono noo qarra tidhate dandiisiissanno kemikaalete kuuso no; gargadhate loosino illachunni loosamanni no yiino.
Babbaxxitino gobbate qooxeessubara kalaqamino kanchafari gidu aana jawa gawajjo diillishino yiinohu kalaa Belayineh; kalaqamino kanchafari sire gidu aana gawajjo iillishikkinni balanxe gargadhate babbaxxitino loossa loosantanni noota huwachishino.
Kanchafaru iillishannota gawajjote deerra buunxanni kemikaale kiifa hasiissannowa badate looso loonsanni hee`noonni yiinohu loosu gumulsiisaanchi; Tigirayete qoqqowira budillitte doogonni gargadhate loosi loosamanni noota egensiisino.
Qoqqowubbate kalaqamino kanchafare gargadhate 8 kemikaale kiiffanno kaameelubba 11 ogeeyye ledo sonkoonni; sonkoonni ogeeyyenna kaameelubba qoqqowoho noo giwirinnu ogeeyye ledo qinaawatenni loossanni afantannotano coyi`rino.
Kalaa Belayineh amadisiiseno, kanchafare gargadhate lee horophilla qixxaabbinore ikkansa xawise; qoqqowubbate kalaqamino kanchafari iillishanni noo gawajjo bidhachishshannota ikka hoogasenni ilaalaame bayichubbara kemikaale kiifate mittu horophili ikkanno yiino.
Mittu horophili 2 kume liitire kemikaale kiifate dhuki noosita buuxise; mitte liitire kemikaale mitte hekitaare baatto diwa dandiitannota huwachishino. Uurrinsha kanchafarenna gide huntanno damuu`la gargadhate hajo la`annonsa bissa ledo qinaambetenni loossannota egensiisino.
Abbebech Maatewoos
Bakkalcho Woxawaajje 11, 2015 M.D
