Addis Ababa:- 2016 baajeettete dirinni konni albaanni xibbuunni 25 anga ikkinoha loosu kalaqonna turizimete goshoosha xibbuunni 20 angara lossate loossanni noota Sidaamu qoqqowi budu, turizimenna ispoortete biiro egensiissu. Lee Hoteella beeddakkote deerrira lophitannotano xawissino.
qoqqowu budu, turizimenna ispoortete biiro laynki sooreessinna turizimete handaari sooreessi kalaa Abbebe Marimo Itophiyu pireesete uurrinshara xawisino garinni; qoqqowoho noota turizimete jiro iillo widira soorrate haammata qarrubba heedhurono; qarrubba dancha kaayyora soorratenni turizimete jiro garunni latinse horonsi’rate loonsanni hee`noonni.
Konninnino 2015 baajeettete dirinni xibbuunni 25 calla ikkitino jiro horonsi’ratenni 108 kume ikkitanno qansootira loosu kaayyo kalanqoonnita xawisinohu biirote sooreessi; 2016 baajeettete dirinni konne xibbunni 20 anga widira lossate illachunni loonsanni afammannitaati coyi`rinohu.
Gobbate gede turizimete iillo latishshi aanaillacha uyne loonsanni hee`noonni yiinohu sooreessu; Hawaasi quchumi aana garbu widoonni assite horophilu doogonna hakkiinnino Oromiyunna Sidaamu qoqqowi qasiiso aana Siraaro Sinqe geeshsha hadhanno mittu barri daa“atto assinanni gawalo loonsanni hee`noonni yiino. Kunino 2016 baajeettete dirinni loosu giddora e“annoha ikkanna; boohaarate Hawaasi quchuma dagganno daa“ataano keeshshiishatenni handaarunni afi`nanni eo lossate kaa`lanno yee huwachishino.
Kalaa Abbebe xawishshi garinni;qoqqowoho gobboomu deerrinni dagoomu aana illachishshino turizime jawa illacha uynoonnite. Turizime egenno jirote ledo qineessatenni loosa xa`mitanno industire ikkase bikkinni maatete turizime maatete jireenyinni buuxisiisa dandiinannihu handaara latisatenniiti. Dagoomunniha heeshshote akatanna budesi turizimete eora eessate loonsanni hee`noonni.
Daa“ataanno buna xinqinanni woyte, waasa honganninna buurisame qixxeessinanni woyte, hattono woloota dagoomu bude xawinsanni akata baadiyyete dagoomi geeshsha daa“attanno gedenna baatto loosidhe galtinori buna gaffe shiqishsharanna eo afidhanno doogo injeessate loonsanni hee`noonnitano coyi`rino. Baadiyyete buna ganfanni gari quchumaho ganfannihunni baxxinoha ikkasinni; tenne kaayyo horonsi’ratenni eote widira soorrine horonsi’ra handaaru miinju lophora qeechisi luphi yiinoho yiino.
Kalaa Abbebe yiino garinni; turizimete handaari dhaggetenni luphiimu garinni jifaminoho. Koovid 19 taraawonna gobbate gede xaadino ga`labbote qarri handaara gawajjino. Gobbayidi daa“ataanono woffi yitanno assino. Ledoteno addita turizimete gawalubba garunni wonshine goshooshate hosiisate ragaanni handaaru foonquwaati.
Dirunnita mixo ontu diri istiraateejiikete mixonni xorshinannita xawisinohu kalaa Abbebe; 2016 baajeettete dirinni sa“i dirihunni loosu kalaqonninna turizimete du`nammenni xibbuunni 20 anga lossate loonsanni hee`noonniha ikkanna; mitte daa“attote gawalo dikkote giddora e`anno. Sase ikkitanno gawalubba qole ijaarshinsa hanafamanno. Qoqqowoho noo beeddakko hoteella 20 ale iillishate loonsanni hee`noonniha ikkanna; amandoonni baajettete dirinni onte ikkitanno Hoteellano beeddakkote deerrira lophitanno gede loonsanni yiino.
Abbebech Maatewoos
Bakkalcho Woxawaajje 11, 2015 M.D
