Addis Ababa:- Kalaqote hedo noonsa qansoota loosu giddora eessatenni miinju wolapho buuxisiisa hasiissannota Loosunna Dandoote ministircho Dukko Muferiyat Kaamiil xawissu.
Loosunna dandoote ministere IFDR Tekniikenna ogimmate qajeelshi Inistituute ledo halamatenni 500 qansooti beeqqitanno umi doyicho qarra tirtanno tekinoloojete gumma burqisatenna lossate illachishino “Semer kaamp” pirogiraame tenne lamala giddo hanafisiissino.
Fanote amanyooti aana Ministircho dukko Muferiyat Kaamiil xawissino garinni; baraartino surrenna kalaqote hedo noonsa qansoota loosu giddora eessate assinanni wo`naalshi kaajje sufanno.
Babbaxxitino gobbate qarqarinni daggino baxxitino kalaqote dandoo noonsa qansoota hawadi yannara qajeelshunni irkisate loosi tekinoloojubba roore woyyeessate hattono haaruudde kalaqubba kalaqate dandiisiisanno yitino.
Ministircho buuxissino garinni; qixxaawo mittu mittunku qansichi noosita kalaqote hasatto roore lossi`ranno gede injaanno akata kalaqate illachishshino. “Semer kaamp” pirogiraame kalaqote hedubba lophitenna guma laalte Itophiya heewisamaancho assitanno gede dandiisiissannote yitino.
Baraartino hedo noonsa wedella gamba assatenni mittu wolunnita dandoo huwatatenni lossatenna rosiisate illacha assitino qixxaawo ikkase buuxissino. Qajeelshunni 500 kubbaaniyoota kalaqate mixo amandoonni yitinoti Ministircho; beeqqaano wedelli lame aganna keeshshite fultanno woyte gobbate tirfitanno uurrinshuwa kalaqqanno doogo injeessate hedo amadinota kayissino.
Mootimma kalaqote hedo noonsare womaashshu irkonni kayse dikki’rate geeshsha noo paakeeje wonshite shiqishshanno yitinoti Ministircho; konnirano yanna garunni horonsi’ratenni gumaho soorra hasiissanno yitino.
“Poletiku wolaphonke annuwunna amuwinke kakkalamooshshinni kaajjinshe hee`noommoreeeti; kayinni miinjunni wolaphinoommokki gobbaati” yitinoti dukko Muferiyat; miinju wolaphonke buuxisiisate kayinni kalaqote hedubba irkisa noonke yitanni coyidhino.
Wolaphonke guuta ikkitanno gede hasi`niro baraartino surre, culka ikkitino anguwa qineessatenni loosu giddora eessa xa`manno yitino. IFDR Tekinikenna ogimmate qajeelshi inistituute qara dayrekitere Dr. Biruk Kedir isi widoonni; gobbate gede dandoote latishshi luphiima illacha uyinoonnisi handaara ikkasi buuxisino.
Loosu kaayyo kalaqatenna gobbate miinjinni woyyitino lopho borreessiisate dandoote latishshi aana hala`ladunni loosa hasiissannota coyi`rino. “Semer kaamp” pirogiraame haaruudde tekinoloojubba kalqatenna horote aana noo tekinoloojubba woyyeessate illchishshinota buuxisino.
Beeqqaano keeshshonsanni dandoonsa qajeelshunni lossatenni roore gumaamo assitanno kaayyo injeessinoonninsata coyidhino. Qajeelshunni sae gobboomu deerrinni sayinsenna tekinoloojete heewubba handaarunni woyyitino kalaqo jawaachishate kaa`litanno yiino.
Sa`u dirrara gobboomu deerrinni sase doyichonni dandootenna tekinoloojete heewubba harinsoonnita egensiisino. Qaru dayrekiterichi xawisino garinni; heewubbatenni qeelaano ikkitino wedella tekinoloojete kalaqo hedubba lossate gobbaanni irko afidhanno doogo injeessa dandiinoonni. Inistituute kalqote hedo noonsa qansoota mitte basera gamba assatenninna
Abbebech Maatewoos
Bakkalcho Woxawaajje 11, 2015 M.D
