Addis Ababa:- Amaaru qoqqowira babbaxxitino dagoomu riqiwamaano ledo hasaawa assatenni qoqqowoho seerunna amanyootu ayirrisamanno gede loonsanni hee’noonnita Layinki Xaphoomu Ministirchinna Gobbayidi hajo ministirchi kalaa Demmeqe Mekonnini xawisi.
Kalaa Demmeqe Mekonnini, ofollonsa Addis Ababaho assidhino Ambaasaadderootira, Dipiloomaatootahonna kalqoomu uurrinshuwa sooreeyyera yannate hajo lainohunni xawishsha uyino. Amaaru qoqqowira kalaqantino gaance sufotenni tirate mootimma assitanni noo sharro xawisino.
Xawishshisinni; Amaaru qoqqowira addi addi dagoomu riqiwamaano ledo hasaawatenni qara qara owaante hanafantanno gede; keeraano qansooti danotenni agarantanno gede, qoqqowoho seerunna amanyootu ayirrisamanno gede loonsanni hee’noonni yiino.
Qoqqowoho lallamboonni wiinamu yanna lallawa gumulote harinsho qarunni seera agarsiisa qoqqowu keere babbaxxitino dagoomu riqiwamaano ledo hasaawa assatenni seerunna amanyootu ayirrisamanno gede loonsanni hee’noonnita xawisino.
Hajote ledo amadisiisaminohunni gumulloonni hajubba heedhurono Piritoriyunniti keeru sumimme gumulo harinshote aana no yiinohu kalaa Demmeqe; Afriku mittimma, wolootu halamaano bissanna kalqoomu daga keeru sumimme gumulora assitanno irko sufansa xawise galata shiqishino.
Farcote ministirchinna wiinamu yanna xaphoomu biddishshi hajajo miili Dr. Gediyoon Ximootewoosi isi widoonni; wiinamu yanna lallawa gumulote harinsho afi’noonni gumi aana dipiloomaatootahonna kalqoomu dagara xawishsha uyino.
Amaaru qoqqowira tungoonnihu wiinamu yanna lallawi amadino quwi aana yannate mashalaqqe shiqishinohu Dr. Gediyooni; mootimmanniti qara hasatto gobbatenna qoqqowoho keere buuxisa ikkinota egensiisino. Hasaawu yannara qarra hasaawunni tirate xaa geeshsha loonsoonni loossa aana dipiloomaatikete daganni shiqqino xa’mora dawaronna xawishsha uyinoonni.
Qiddist Gezaheny
Bakkalcho Woxawaajje 11, 2015 M.D
