Addis Ababa:- Ki`nehu qaru loosi Itophiyu jawaante agarsiissine albillicho hadhanno gede assate yaanni Xaphoomu Ministirichi Abiy Ahimed (Dr) gargarooshshu olanto komaandoranna diilallote wolqa hajajo maasso aana sokkasi sayisino.
Gargarooshshu olanto komaandonna diilallote wolqa hajajo Bilaatte Komaandonna Diilallote wolqa Qajeelshu Mereershi qajeelaano 41ki doycho komaando, diilallote wolqanna addi wolqa gano diigganno miilla Xaphoomu Ministirichi Abiy Ahimedi noowa tenne lamalara maassiinsoonni.
Xaphoomu Ministirichi Abiy Ahimed (Dr) maassote yannara coyi’rino garinni; Itophiyaho ikkitannota jawaata wolqanna olanto ijaarate jawa looso loonsanni hee`noonni.
Ikkadimmatenninna jawa kiiro afidhino komaando, diilallote wolqanna gano diigganno miilla qajeelshinoommo yiinohu Xaphoomu Ministirichi; gobbate giddonna Baara widoonni qajeeltino olanto ola gatissinota ikkanna; dhukunni aleenni ikkino olino dayro qeechase fula dandiitannota yannitte olanto ijaarranni hee`noonni yiino.
Bilaatte maassiinsoonni komaando, diilallote wolqanna gano diigganno miilla konne yannichu oli ijaari bisooti yaanni coyi`rino. Tenne bayra gobba olanto ikkanna duumo uddi’ra jawa kaayyooti yiinohu Xaphoomu Ministirichi; ikkadimma kaima assine, ola gargartannorenna ola jeefissannota yannitte olanto ijaarranni hee`noonnita egensiisino.
Ki`ne ola guddine qeelle lallabbinannireetinna Itophiyu baandeera gotti assitinannireeti; ki`nehu qaru loosi Itophiyu jawaante agartine agarsiissine albillicho hadhanno gede assate yiino. Itophiyuta jawa wolqa ikkitino olanto maassiisate mereero afama`yara ayirrinyu macciishshamannoe yiinohu Abiy; tenne wolqara lamu illachi noose; olu hee`rannokki gede assanna diinu xiiwe dayro nafa ola jeefisiisate sokko noonsa. Togoo wolqa tenne jawa gobba kaajjishshe ilamate saysa noonsa yaanniiti coyi’rinohu.
Olu manna itanno; jiro hunanno; latishshu harinshowiinni gufisanno. Olu huno ikkinnina horo noosikki daafira ola gatisa yannitte olantora qara loosooti yaanni caakkeessino. Komaandonna diilallote wolqa hajajo miilla uynoonninsa sokko fulate jawaata wolqa ikka noonsata huwachishino.
Itophiyu hasatto hiittenne yannarano keereho yiinohu Xaphoomu Ministirichi; halaale amaddinore, baxillunni wo`mitinore, buqqeensa loossannorenna ikkadimmansa leellishshanno olanto gobbate keere agarsiissannota coyi’rino.
Itophiyu jawa miinja ijaartani noo gobbaati. Tenne bayi’ra gobba olanto miillaha duumo badooshshe uddidhine gobbate owaante aa bayi’ra ayirrinyeeti yiino.
Komaando, diilallote wolqa, canco diiggannori addi wolqa olaho leellishshino jawu gumulshira maarshe soorritannore, uullate diroonenna ola jeefissannore yine woshshinanni su`mi noonsata maassote yannara xawinsoonni.
Abrahaam Saamueel
Bakkalcho Woxawaajje 11, 2015 M.D
