2015 Baajeetete dirinni gobbayidi dikkora shiqino laalchinni 54 Miliyoone Doolaare ali e’’o afi’noonnita Hawaasi Industirete paarke egensiissu.
Paarkete 24 kumi ale ikkitino Oppireeterera loosu kaayyo kalaqantino. Industirete paarke qaru loosu harisaanchi kalaa Maatewoos Ashennaafihu Itophiyu Pireesete Uurrinshara xawisino garinni; AGOA xiiwo dandiite Industrete Paarke gobbaydi dikkora shiqishshino laalchinni 54 Miliyoone doolaare ali e’’o afi’noonni.
Kalaa Maatewoosi xawishshi garinni; Hawaasi Industirete paarkera laashshinanni hoccootu laalchinni 8 Miliyoone Doolaare e’’o afi’noonniha ikkanna gattino e’’o babbaxxino laalchinni afi’noonnite. Paarkete laalchi Afriku gobbuwara, Awuropahonna Ameerikaho afantanno dikkora shiqanno yinohu kalaa Maatewoosi; baxxinohunni Ameeriku, Ingilize, Jermenenna Ferensaye paarkete laalcho qarunni iillinshanni gobbuwa ikkansa egensiisino.
Loosu harisaanchi xawisanni; Industirete paarke kalqoomu deerra agadhitinnore 52 sheedda afidhino . 44 sheedda loosu aana nooha ikkanna 22 investerra loossanni afantanno. Deerransa agadhitinorinna loosoho qixxaabbinori 8 sheedda fano ikkansa qummi assinohu qaru loosu gumulshaanchi; harancho yanna giddo 6 sheedda investerootunni amadisiisate dandiisanno looso gumullanni hee’noommo yino.
Paarkete afantanno babbaxxitino gobbuwa investerooti qarunni Chayinu, Banglaadishete, Hindete, Hong Kongi, Indooneezhiyu, Siriilaaku investeroota bobbaahansa egensiise; ledoteno sase gobba giddo dureeyye paarkete bobbahansa qummi assino.
Paarkete giddo afantanno investerooti 24 kume ali Pppireeterrara loosu kaayyo kalaqantinonsata xawise; paarkete afantanno loosaasine dandootenna teknoloojete egenno afidhanno gede loonsanni hee’noonnita coyi’rino.
Hawaasi industirete paarkera afantanno sheedda wo’munni wo’ma loosu giddora e’anno woyte 60 kumi qansootira loosu kaayyo kalaqa dandiitanno. Konninnino laalchonna laalchimma lossatenni gobbara sonke afi’nannita gobbayidi soorro lossate dandiisannoho yino.
Paarke laalchimma lossatenna AGOA agawo xiiwo dandiite woyyaawino guma abbate loossanni afantanno yaanni coyi’rino. Itophiyaho AGOA kaayyo aana agawo tugate albaanni paarkete laalchi 80 Miliyoone doolaare ali e’’o ikkitinota egensiise; xiiwo dandaate Awuroppanna Afriku dikkuwa iillo halashshate loossa gumulloonnita xawisino.
Aantete AGOA agawo kayinsanni akati hee’riro nafa laalchoho iillo gobbuwa Afrika qolle halashshate hendoonnita qummi assino. Laalchu islanchimma lossatenni Awuroppu gobbuwa dikkora shiqishate dandiisanno looso loonsanni hee’noonnitano loosu harisaanchi lede egensiisino.
Qiddist Gezaheny
Bakkalcho Woxawaajje 4, 2015 M.D
