Hawaasa: Qoqqowoho wodhotenna seeru gobbaanni millissanno hiittenne bissa aana seeru qaafo adhinannita Sidaamu qoqqowi keerunna ga’labbote biiro sooreessi kalaa Alemaayyehu Ximotewoosihu xawisi. Sooreessu tenne coyi’rinohu Sidaamu Qoqqowi Poolisete Komishiine harissanni keeshshitino qoqqowu deerri poolisete massagaanonna miilla keenote ba’re aanaati.
Sidaamu Qoqqowi Polisete Komishiine sa’u sase aganna giddo qoqqowunni kayse woraddate geeshsha harissanni keeshshitino Polisete massagaanonna miilla keenote ba’re Hawaasi quchumira harissanni keeshshitinoti qaangannite.
Xaphoomu ba’re aana leellinohu Sidaamu Qoqqowi Keerunna Ga’labbote Biiro Sooreessi Kalaa Alemaayyehu Ximootoosihu, saiha Sase agana xaphooma Polisete massagaanonna miilla keeno assinanni keeshshinoonnita xawisino.
Kalaa Alemaayyehu hasaawisinni, tenne keenonni leeltino qarrubbanni polisete massagaanonna miilla aana adhinoonni qaafo eeli geeshsha dagate ba’re kalanqe dagate reqecci assinoonnita qummi asse; ba’re daga ga’labbonsa aana haariintannokki gedenna adawu bissano seeru garinni sokkonsa garunni gumultara hasiissanno gede huwachishshannota ikkase xawisino.
Wole widoonni xaa yannara dagatenni doorantino mootimma wolqatenni diigate mitu mitu qooxeessira leeltanno ikkitubba Sidaamu Qoqqowirano sa’e sa’e leeltannota qummi assinohu sooreessu;Konnirano Federaalete mootimma seera ayirrisiisate qaafo adhitanni afantannota coyi’rino. Sidaamu Qoqqowi giddono wodhotenna seeru gobbaanni millissanno hiittenne bissa aana qaafo adhinannita xawisino.
Sidaamu Qoqqowi Poolisete Komishiine Komishiinere Shimellisi Toomaasihu isi widoonni, qoqqowu garinni poolisete haaroo’ma hasiissinoha ikkasinni, qoqqowunni kayse woraddate geeshsha poolisete woyyeesso assate keeno hananfoonnita qaagiissino.
Polise daganna mootimma uytinoseti jaddo gargarate yawo nooseta kaysannohu komishiinerichu, assinoonni keenonni kayinni uynoonninsa yawo badhera qolte horonsa balaxisiisatenni mommoddo kalaqqannori handaaru bissa hee’ransa bandoonnita xawise; baxxinohunni tiraafiikete, jaddo gargaratenna qorqorshu ragaanni daga co’ichimmatenni afidhanno owaantenni roore muishshunni sarxaawa hee’rase buunxoonnita komishiinerichu xawisino.
Aantetenni bandoonni qarrubba aana illacha tunge loonseemmo yiinohu komishinerchu; Sasu Sasu aganinni gumulloonni loossa keennanni sunfanni harinsho heedhannota qummi assino. Polisete massagaanonna miillano insa widoonni, harinsanni keeshshinoonni keeno meessaneetensa la’anno gede assitinonsata coyidhe; daganna mootimma tugginonsa yawo aantetenni albinni woyyaawino garinni fulate qixxaabbinota xawissino.
Addisu Adoola
Bakkalcho Woxawaajje 4, 2015 M.D
