Addis Ababa: – Dagate keerenna ga`labbo agarate Ministirootu Amaale Mine wiinamu yanna lallawi fula hasiisannota ikkitinota Farcote Ministire Geediyooni Ximootoosi (Dr) egensiisino. Amaaru qoqqowira ka’ino gaance ga’labbisate Daanno 6 aganira kaajjanno lallawa gumulsiisate wiinamu yanna lallawi Xaphomu Biddishshi hajajo uurritino.
Geediyooni Ximotiwoosi (Dr) Ministerootu Amaale Mini fushshino wiinamu yanna lallawi aana uyno xawishshinni xawisinonte gede, dagate keerenna ga`labbo agarate wiinamu yanna lallawi Federaalete ga`labbote uurrinshuwanna Ministirootu Amaale Mine keenneenna hasiisannoha ikkinota gumulloonni.
Lallawu dagate keerenna ga`labbo agarsiisate fulinohu Ministirootu Amaale Mini wiinamu yanna lallawi kiiro 6/2015 M.D yine woshshinanni yiino. Amaaru Dagoomi Qoqqowi Mootimmara leellannohu qodhotenni irkinsoonni millimmo qoqqowu giddo noo ga`labbote uurrinshanni seera ayirrisiisate looso dandiinanikki deerra iillinoonni yiinohu Ministerchu; qarru qoqqowu miinjanna dagoomu millimmo aana jawa gede rakkisanni noota coy`rino.
Ga`labbote booraambe loosi qoqqowu daga aana xiiwo kalaqinoha ikkanna; qoqqowu mootimma bayriidi seeri kaiminni Federaalete mootimma hasiissannoha seera ayirrisiisate looso loosanno gede xa`mo shiqishshinota egensiisino.
Wiinamu Yanna lallawa gumulsiisate qara gede hasiishshi Amaaru qoqqowi gashshooti giddo ikkinota faajjetenni xawinsoonnita qummeesse, lallawu hasiissannoha ikke leelliro gobba baalate gumulamannotano egensiisino. Amaaru Qoqqowira gumulamanno gede Ministirootu Amaale Mine lallamboonnihu wiinamu yanna lallawi kiiro 6/2015 M.D daanno lewu agannara kaajjinoha ikkannota buuxisino.
Lallawu gumulamara wiinamu yanna lallawi Xaphoomu Biddishshi Iize uurrinsoonnita kule, woshshamannohu Xaphoomu Ministerichira ikkanna, massagamannohu IFDR Gobboomu Mashalaqqenna Hobbaatu Owaante Dayrektere Jeneraalenni ikkinota huwachishino.
Hajajote miilla tantanao Xaphoomu Ministerichi gumulannoha ikkanno; Xaphoomu Biddishshi hajajo yanna woy bikkine uyinoonni yanna lallawa dandaanno; yannate geeshsha hasiisannoha ikke leelliro mitte doogo owaante uuytannota, hodhishshu uurrinsha hayyo cufara woy murrara hajajate biiloonye uynoonninsi yiino.
Xaphoomu Biddishshi hajajo, gobbatenna bayriidi seeri amuraati aana iillitanno hiittenne jaddonna wiinamu yanna lallawa taayise sa’’anna lallawa gufiste jaddo gumultinnore, gumulate wo`naaltinnore woy gumulate qixxaawote aana noo yee huluullamino bissa yoote mini hajajo nookkiha seeru hundaanni assate biiloonye uynoonnisita hasaawino.
Biddishshu hajajo huluullammoonni uduunnenna urde woy bagado amadatenna wole tajubba afi`rate yoote mini hajajo nookkiha hiittenne yannarano ikko hiikkonne bayichono hodhishshu kaameelano ikko woloota uurrinshannna gallanni minna baalate giddo e`ne hasate biiloonyi noosita caakkeessino.
Wiinamu yanna lallawi giddo Ministirootu Amaale Mine uynoonnisi biiloonyi kaiminni wodhonna biddissa fushshatenna gumulsiisate biiloonye uynoonnisita xawisino. Dagate Riqiwamaano Amaale Mini lallawu hasiishshi yanna ikkitino yee ammanniro, wiinamu yanna lallawi gumulonnihu lewu agani goofikkinni kawaanni uurrisara dandaannota Ministerchu xawisino.
Abrahaam Saamueel
Bakkalcho Woxawaajje 4, 2015 M.D
