Addis Ababa:- Baajeettete dirinni 3.5 biliyoone birra ali kaapitaale borreessiissino 99 dureeyyera investimentete fajjo uyinoonnita Sidaamu qoqqowi investimentete komishiine egensiissu.
Qoqqowu komishiine investimentete piroomooshiine, fajjonna mashalaqqete dayrekitoreete kalaa Taariku Rooba Itophiyu pireesete uurrinshara xawisino garinni; 2015 baajeettete dirinni xaphooma kaapitaalensa 3.56 biliyoone birra borreessiissino dureeyyera investimentete fajjo uyinoonni.
Kalaa Taariku xawishshi garinni; investimentete fajjo uyinoonni dureeyye mereerinni 31tu konstiraakishiinete handaarinni, 29 qole, owaantete handaarranni, 22 industirete handaarinni hattono 17 giwirinnu handaarranni bobbakkinoreeti.
Sidaamu qoqqowi baajeettete dirinni jawaachishanno investimentete gumulsha borreessiissino yiinohu kalaa Taariku; diru giddo investimentete handaarinni uurrinshunni 3 kume 174 mannira loosu kaayyo kalaqantinota xawisino.
Qoqqowoho afantanno 30 woraddara hattono Hawaasi quchuma lede 6 quchummate gashshootta investimentete injiitanno yine doorroonninsata egensiisino. Ledoteno Alatta Cuukkote, Daarratenna Hawaasi gaangaawi woradda baxxino garinni investimentete injiitanno qooxeessubba yine doorroonniri mereero ikkitinota coyi`rino.
Laashshotenna giwirinnu handaarinni ledote owaantete handaarinnino Hawaasi Garbi gaangaawira jajjabba Hoteellanna Rizoortubba ijaarshate aana bobbakkanno dureeyyera baxxino illacha uyine loonsanni afammanni yiino. Baajeettete dirinni qoqqooho investimentete fajjo adhitino dureeyye mereerinni batinyu gobbate giddo dureeyye ikkansano kalaa Taariku egensiisino.
Qoqqowu sase investimentete illachi ragi noosita buuxisinohu kalaa Taariku; illachu ragubba investimentete dhuki xiinxallonna baattote qixxaawo, egensiisatenna fajjonna harunso ikkansa huwachishino.
Qoqqowoho nooti investimentete millimillo lexxitanno gede hasiissanno wo`naalsha assinanni yiinohu kalaa Taariku; qoqqowoho noota kalaqamu jiro qineessatenni laatissanno dureeyyera qixxaabbino sanadubba heeransano coyi`rino. Kalaa Taariku coyi`rino garinni; aananno baajettete dirinnino handaarunni 3 kume ale ledote loosu kaayyo kalaqate mixi`ne loonsanni hee`noonni.
Doogote, caabbichunna waay, safote latishshubba, yannate Baankete liqoo qinaawa hooga, gobbayidi soorro anjenna womaashshu shiqisho qarrubba qoqqowoho investimentete handaari aana luphiima mitiimma ikkite keeshshitinotano qummeessino. Qarrubba tirateno hajo la`anno bissa ledo malloonni yiinoha ikkanna aanteteno qarrubba wo`munni wo`ma tirate hajo la`anno bissa qinaambetenni loonsannita xawisino.
Abbebech Maatewoos
Bakkalcho Woxawaajje 4, 2015 M.D
