Qoqqowu Dagitte Owaantenna mannu jiro latishshi biiro xaphoomu riforme umi doycho looso mootimmate loosaasine haaroonshi layinki gafi hanafisiisate bare aana hasaawa assitu.
Dagittete owaante lifixisate mootimmate loosaasine umi doyicho sa’u lame lamala giddo daga kiisate sheemaate e’inoti qaangannita ikkitanna; owaataano owaatamaanote e’ino sheemaate loosunni leellishshanno gedeno harunso assinanni hee’noonni.
Qoqqowu Dagitte Owaantenna mannu jiro latishshi biiro xaphoomu riforme umi doycho looso mootimmate loosaasine haaroonshi layinki gafa hanafisiisate bare aana hasaawa assinohu barru wosinchinna Sidaamu Qoqqowi Jireenyu paarte sooreesi kalaa Abrahaam Marshallohu; loosaasine haaroo’matenni dagoomaho isilancho owaante qoqqowu biironni hanaffe eeli geeshsha noo tantanora aate dandisiisanno sanade shiqqeenna riforme adhitino loosaasine mixote garinni loosa hasiissannonsa yiino.
“Paartenke yannate kalaqantinota heeshshote oolto qarra tirate loossanni no” yiinohu kalaa Abrahaam, “owaante adhite dagganno owaatamaano isilancho owaante afidhanno gede assatenni latishshu loosira higgano gede assa hasiissanno” yaatenni huwachishino.
Qoqqowu Dagitte Owaante biiro sooreessi kalaa Assefi Gurraachihu isi widoonni; rossino mannu wolqa yanna xa’mitanno garinni xaadinse horoonsi’ra miinju, polotikunna dagoommittete aana soorro abbate baalunku loosa hasiissanno.
Qoqqowu mereershira assinoonni keenonni laafanna kaajjado midaado ripoortete kulloonnita xawisinohu kalaa Aseffi Gurraachihu, foonqe noo baycho illachiishshe baalanti mootimmate giddo noo sooreeyyenna loosaasine qeechansa fula hasiissannonsa yiino.
Gaazeexu Odeessaanchinni
Bakkalcho Woxawaajje 4, 2015 M.D
