Xaphoomu Ministerichi Abiy Ahimed (Dr) Wodiid Kooriyi Ripebilike Gobbaydi Hajo Ministerchi ledo xaade hasaawino. Xaphoomu Ministerichi Abiy Ahimed (Dr) Wodiidi Kooriyi Ripebiliike Gobbaydi Hajo Ministerchi Paark Jiini ledo xaade beroo barrati borrosi mine koyise hasaawisinohu.
Lamente gobbuwa widoonni noo halamme, qarqarunna kalqoomu hajubba aana torbitino.Lamente gobbuwa mereero nooha daddalu xaadooshshe lossate widoonni noo hajo aanano amaaltinonoha ikkanna, Wodiidi Kooriyi Ripebiliike Gobbaydi Hajo Ministerchi Paark Jiini Itophiya ei yannara IFDR layinki xaphoomu ministirichinna gobbayidi hajo Ministirichi Kalaa Demmeqe Mekonninii ledo hala’lado hasaawa assino.
Itophiyunna Wodiidi Kooriyi dipolomasete xaadooshshensa woyyaawino deerrira iillishate sumuu yitinotano hasaawinsanni buuxissino. Wodiidi Kooriyi dipolomasete xaadooshshe woyyaawino deerrira iillishate sumuu yitinota Layinki Xaphoomu Ministerichinna Gobbaydi Hajo Ministire Kalaa Demmeqe Mokkonniinihu xawisino.
Hasaawu gedensaanni uytino gutu xawishshi yannara Kalaa Demmeqe Mokkoniinihu xawisanni, Paarki Jiini Itophiyaho faajjete loosu towaanyo assino daafira galatanni, hasaawansa lamente gobbuwa mereero nooha haammata dipolomasete xaadooshshe kajjishate kaayyo kalaqanno.
Kalaa Demmeqe egensiisinonte gede, Itophiyunna Wodiidi Kooriyi ledo dipolomasawete xaadooshshe hanaffinkunni 60 diro kiirsiisino. Xaa yannara lementi gobbuwa xaadooshshensa woyyeessate baxxitino tiro uyte gutunni loosate sumimmete iillitino.
Itophiyu lamente gobbuwa xaadooshshe woyyeessate noose qixxaawo leellishshino yee Kalaa Demmeqe coy`rino. Paarki ledo lamente gobbuwa xaadooshshe lainohunni hala`lado hasaawa assinoommo yiinohu Kalaa Demmeqe, qooxeessunna kalqoomu hajo widoonnino amaaltinota qummeessino.
Hasaawinke giddo seeda yannara keeshshinoha lamente gobbuwa xaadoshshe roorenkanni lossatenna dagate horo buuxisate sumuu yinoommo yiinohu Layinkihu Xaphoomu Ministerichi; Wodiidi Kooriyi dipolomaasawete, miinjunni, budunninna dagittete handaarranni Itophiya jawa gede kaa`litanno gobba ikkite sufate qophaabbe noota Kalaa Demmeqe xawisino.
“Daddalunni, investimentetenninna latishshu halamme loosinni baxxino illacha uyne sufa hasiissannonketa hasaawa assinoommo. Baxxinohunni, koviidi 19 fayya yannara noo halamme kaajjite suffanno gede sumuu yinoommo” yaanni Kalaa Demmeqe guwursino. Wodiidi Kooriyi Ripobilike Gobbaydi Hajo Ministire Parki Jiini isi widoonni, assinoonnisi iibbado wosinsi’rara galata shiqishe, lamente gobbuwa halamme babbaxxino handaarinni jawa hasaawa assinoonnita coy`rino.
Baxxinohunni, lophote handaarinni, daddalunninna investimentete widoonni noo xaadooshshi lophanno gede loonseemmo yiinohu Parki, Kalaa Demmeqe ledo assinoommo hasaawinni Wodiidi Kooriyi lamente gobbuwa xaadooshshe jawa gede isitiraatejikete irkisama widira reekkate fajjitinota huwachishino.
Lamente gobbuwa dipolomasete xaadooshshi hanafamino 60ki diro ayirrinsemmo yannara lamente gobbuwaha gutu horo buuxisate yiinohu Ministerichu, albillichono baalunku xaadooshshinni noonke dipolomasawete hajo lossa hasiisannonke yiino. Afirikaho noo gobbuwa mereero Itophiyu balaxo uynoonni Kooriyu gobba irkisancho ikkitinota qummeessino.
Mootimmansa, Wodiidi Kooriyinna Itophiyu mereero noo irko lamente gobbuwanna haammata daga hanqaffino gutu horamimma lossate hasatto noonsata xawisinohu Ministerchu, gobbuwa jajjabba ikkitino handarranni halante suffannota buuxisino.
Bakkalcho Woxawaajje 4, 2015 M.D
